Den cuadro cu e caso sumario recien entama por medio di Aruba Birdlife Conservation contra Land Aruba pa protege un parcela di wetland, e tratamento lo sigui den april.

Ayera hues a scucha ambos banda Aruba Birdlife y gobierno anto analisa tur e informacion cu tin te ainda riba e asunto aki. Tabata tin un di tres partido cu kier a interveni den e caso ayera cual ta e compania Elmsford representando The Mill pero esaki a keda nenga den corte pues el a keda un caso entre ABC y Land Aruba. Actualmente tin baricada na e area pa stop cualkier tipo di actividad temporalmente. Pues hues a haci un peticion pa mira si por bin cu un tipo di areglo cu minister di infrastructura pa sigura e area. Gobierno ainda tabata falta di colecta algun informacion relaciona cu e pida parcela aki cual aparentemente a keda otorga den 1989. “Locual nos ta spera ta cu minister lo para tras di e Ruimtelijk Ontwikkelingsplan (ROP) y bisa cu e area aki ta protegi anto nos lo haci nos maximo esfuerso pa sigui protege e area aki tambe”, abogado na defensa di ABC, Geert Rep ta bisa Bon Dia.

Proteccion di wetland
Casonan anterior a wordo menciona cu ta core casi den e mesun liñanan cu esaki manera por ehempel e caso di Ocean Z unda tabata tin discusion di actuacion robes di notario, gobierno y desaroyado.  Como tambe e caso recien di de Veer Chain Theatres riba e otorgamento di e opcion pa un tereno den Palm Beach tambe situa riba wetland.  Den cuminsamento di luna di maart manera nos a publica, den nomber di Aruba Birdlife, un caso sumario a keda lanta pa loke ta trata desaroyonan na un pida parcela wetland banda di The Mill Resort. Aparentemente tabata tin rosamento tumando luga na e parcela aki pa asina por construi mas di camber di hotel, pero e area aki ta para den zona berde riba e ROP. A pidi accion di biaha di corte pa para tur actividad temporalmente na e area aki algun siman atras cual a keda honra mesora.

Hasta boluntarionan a wordo pidi pa keda pendiente si lo mester a traha un human shield na e area aki pa protege un famia di shoco cu tin actualmente eynan. Autoridadnan cu a presenta mesora tabata Aruba Birdlife, Parke Nacional Arikok, Departamento di Medio Ambiente y minister di Infrastructura Otmar Oduber (POR) tambe a bay tira un bista.

Desaroyo di casi 30 aña
Combersando cu chief engineer di The Mill algun siman atras nos a compronde cu pa 29 aña caba nan ta pagando grondbelasting y erfpacht pa e pida parcela aki.
Tur impuesto ta paga tambe y esaki ta e tercer fase pa completa nan proyecto na The Mill, conectando e cu e otro banda.  E chief engineer ta bisa cu e pida tereno patras ta wetland, pues esun cu no ta rosa net no ta parti di e zona berde te asina cu e ta na altura di dje pa tur e añanan aki.  Segun nos a compronde, e pida tereno aki no tabata nunca registra tampoco riba The Mill of ningun otro nomber.  Desde februari 2018 e parcela a wordo registra den nomber di Mill Resort cual ta algo straño pasobra e compania a bay bancarota na 1993.

Un preocupacion sigur ta keda cu si e desaroyadonan ta pagando tanto placa pa luna di erfpacht/grondbelasting pa e tereno aki desde 1989 y resulta cu tabata riba zona berde anto mester entrega e tereno bek, e pregunta ta keda si tur e placa aki lo wordo paga bek, con e cos aki lo mester ta hinca den otro como tambe varios otro preguntanan cu ta keda habri ainda