Polis ta splica e falta di comunicacion cu DOW
Siman pasa Bon Dia Aruba a publica un articulo splicando cu ainda no a tuma accion tocante di e speeltuin(nan) cu ta forma parti di ‘Green corridor’, no obstante cu tin un mocion unanime cu a pasa den parlamento, pidiendo gobierno pa solucion. E minister encarga cu infrastructura te na e momento aki no ta/kier duna reaccion na Bon Dia Aruba pa algun siman caba riba e tema aki. Vocero di e minister a keda di coordina pa nos por haya informacion cerca director di DOW, pero esaki tampoco a sosode ainda.
Nos redaccion a tuma contacto cu hefe di motorunit di KPA, Alex Pieters, kende ta splica cu e ta na altura di e speeltuin situa banda di caminda sin ningun siguridad y cu un rapport a wordo traha. Sr. Pieters tin casi dos aña caba ocupa cu e caso aki, pero ainda no a haya un feedback di e situacion. Detaye di e conseho no a wordo haci conoci na nos redaccion.
“Tin un preparacion y un plan pa locual ta trata di pone un heki pa asina duna e speeltuin un siguridad, pero ki tempo lo cuminsa cu traha riba e plan aki ainda no ta sigur ”, sr. Pieters a splica. Si polis ripara cu un construccion, parke o cualkier otro cos cu por trece peliger sea den trafico of pa comunidad, semper nan por manda un rapport of conseha e instancia concerni pa asina evita gravedad. Sr. Pieters a aclara na Bon Dia Aruba cu no ta su tarea pa papia di e tema aki, pero locual si por haci ta duna tipnan y conseho den e caso aki di e speeltuin na Pos Chikito. DOW y Planologie di polis ta esun nan concerni cu esaki. Locual ta trabou di construccion y con ta haci esaki polis no tin nada di dicidi den e maneho ey, asina tampoco tin ningun influencia pa esaki, segun sr. Pieters.
DOW ta esun encarga cu e wegbeheer, esaki kiermen cu nan tin nan specialistanan y ingenieronan cu nan ta specialisa den e trabounan di caminda. Locual polis tin influencia riba dje ta e MB (Ministrele Beschikking). Esaki ta nifica e parti di cua sorto di liñanan lo bay bin, e borchinan y cualkier otro cosnan necesario cu mester asigna na cierto caminda. E ta asina cu DOW ta manda e conseho na polis anto polis ta skirbi un MB pa minister y ora esaki wordo firma, DOW ta pone e borchinan of e metodonan necesario cual ta bin den e regla di trafico. E construccion y structura no tin nada di haber cu polis. mayoria di biaha polis ta djis duna conseho den diferente aspecto pa asina trece mas siguridad riba caminda, sr. Pieters ta splica. Sr. Pieters a sigui splica cu nan no por stop e trabou, pero locual nan por haci ta manda e conseho anto si e instancia concerni ta haya cu KPA tin rason e ora ey ta bini cambionan den e construccion.
Falta di comunicacion
“No ta facil paso hopi biaha nos ta haya critica, pero problema ta cu DOW no ta sinta comunica cu nos. Nan ta wak e parti di maneho cu infrastructura, achteraf nan ta bin cerca nos”, asina sr. Pieters a remarca.
Sr. Pieters ta pone enfasis na final cu e ta keda na DOW si nan kier tuma accion den e caso di e speeltuin.
