Redaccion di Bon Dia Aruba a ricibi copia di un carta di Tim Peterson, specialista ciruhano, cu el a dirigi na Inspeccion di Salubridad Publico (IVA) y na Departamento di Salubridad Publico Aruba (DVG), den cual e ta deposita un keho pasobra ta den medionan di comunicacion e mester a haya sa cu entre e datonan cu a leak di e personanan cu a test na aeropuerto, su nomber tambe ta aparece, y segun su opinion completamente inhustifica. Y esaki cu consecuencianan grave pa su persona, su pacientnan, su personal y tercer persona.

Cu e carta aki e ta describi pakico su aparicion riba e lista ta inhustifica, y ta presenta obhecion tambe contra e hecho cu e lista a leak. Fuera di e violacion di su privacidad e ta constata tambe cu tin aki un violacion grave di secreto medico. Ademas e ta puntra su mes con por ta cu a traha e lista aki asina, cu nunca mester tabata traha di e forma aki, sigur no sin regla cla con ta garantisa secreto y confidencialidad di e contenido. Como ciruhano cu 25 aña di carera na Aruba e ta sinti su mes obliga di duna di conoce con e asunto aki a bay, y cu e kier haya sa con esaki por a sucede cu su nomber a resulta riba e lista aki.

Dia 9 di augustus el a bolbe di Hulanda unda el a pasa vacacion cu su famia. El a haci test na aeropuerto pa Covid-19, unda el a observa caba cu e situacion tabata un poco desordena ora di tuma e pruebanan. Despues el a haya un email den cual tabata bisa cu e resultado di e test ta conoci y cu lo tuma contacto cu su persona y a pidie pa keda den isolacion. Di e ultimo aki el a deduci cu posiblemente e tabata positivo. Sin embargo, finalmente e no a haya un resultado y nunca a ser yama via telefon tampoco.

Pasobra e no tabata confia e test y ademas lo kier a traha si e no ta positivo, el a haci test di nobo dentro di 15 ora, promer cerca Laboratorio di Servicio, y despues na LABHOH-Fundacion Servicio Laboratorio Medico Aruba (Rosingh/rodenburg). Ambos test a resulta negativo.

A base di esey a conclui cu mester tabata trata di un intercambio di muestra na aeropuerto, despues di cual el a haya permiso di director Staring di DVG pa reanuda su trabao. Mirando esaki lo tabata normal, segun Peterson, si DVG lo a kita su nomber for di e lista, pero esaki no a sucede y e ta sinti su mes sumamente perhudica cu su nomber a keda riba e lista ey.

Tur hende cu desde 11 di augustus tabata den contacto cune, despues cu el a reanuda trabao, lo tabata innecesariamente preocupa ora nan lo a haya sa cu su nomber tabata riba e lista. Esey segun Peterson no ta algo pa laga pasa, pasobra e nunca lo pone su pacient, personal of otro persona na peligro.

E ta constata por lo tanto cu tin un manera sumamente descuida di anda cu datonan di pacient na DVG y ta trata tambe di e disposicion no autorisa di e datonan medico – e lista cu persona cu a test positivo pa Covid-19 – loke ta un violacion grave di secreto medico.

Banda di pidi un investigacion con tur esaki por a tuma lugar, e ta pidi tambe pa a traves di un publicacion den un corant di Aruba confirma oficialmente cu su nomber tabata inhustificadamente riba e lista, pa duna claridad na su pacientnan y otronan cu tabata den contacto cune desde 11 di augustus, cu nan no mester preocupa, esaki tambe pa reestablece confianza. E carta tabatin copia pa ministro encarga cu Salubridad Publico, y medionan di comunicacion.