Den cuadro di Dia di Piscado siman pasa, Ministerio di Naturalesa a invita piscadonan cu harpoen (tiradonan di pisca) na bestuurskantoor pa presenta na nan e maneho di tiramento di pisca (spearfishing). E meta principal ta pa yega na regulacion duradero y harmonioso pa ambos, naturalesa como ciudadano, segun e minister a expresa.
Aña pasa na Centro di Bario Playa Pabou a tene un reunion cu tiradonan di pisca unda nan a scoge nan representantenan pa forma parti di un comision pa asisti den e maneho nobo di spearfishing. Durante transcurso di aña, ministerio di Naturalesa hunto cu e comision a reuni cu varios stakeholders manera Santa Rosa, Directie Natuur en Milieu, Fundacion Parke Nacional Aruba, Warda nos Costa, Polis Maritimo y Directie Scheepvaart, pa asina den un manera participativo yega na un maneho duradero.
Algun cambio cu ta resalta den e proposicion di maneho nobo ta e sistema di permiso. Santa Rosa como e departamento di Agricultura, Cria y Pesca ta esun encarga pa maneha e permisonan entre otro registracion di esaki. Den e maneho aki lo regla tanto tiramento riba pisca no protegi como pisca invasivo (manera lionfish).
Puntonan di e proposicion di maneho di Spearfishing ta cu esaki lo wordo permiti solamente cu un permiso di Minister di Naturalesa. E permiso otorga di spearfishing lo ta valido pa un aña y ta mara na un suma anual. Basa riba dato di permiso di Santa Rosa lo controla importacion y benta di arma y piesa di spearfishing tanto pa e ‘speargun’ como e ‘pole spear’.
Fuera di esaki esnan cu ta desea di practica spearfishing lo mester sigui un curso obligatorio cu lo enfoca riba conocemento di nos especienan marino, conocemento di e leynan y regulacionnan relevante como tambe e aspecto di siguridad pa e tirado di pisca.
Cambio den e uso di herment di un tirado di pisca tambe a wordo presenta cual ta entre otro cu ta permiti arma di spearfishing cu elsatico (power bands) y ta prohibi arma di pesca neumatico (presion di aire).
Teniendo na cuenta cu nos bida marino, un lista positivo lo wordo crea pa indica cua especie di pisca por casa usando arma cu trekker y por ehempel riba especie invasivo lo permiti arma sin trekker p.e. lionfish. Lo introduci regulacion di areanan asigna y metodo cu por usa pa e tirado di pisca.
Un otro parti cardinal di e maneho nobo ta datos, registracion di datos ta obligatorio minimo 1 biaha den cada 6 luna encuanto e especie, grandura y area. Santa Rosa lo ta esun responsabel pa colecta y maneha e datonan aki. Asina por cuminsa na percura pa un manera mas responsabel di spearfishing.
Ehecucion di un maneho ta encera control y ariba esun di spearfishing lo rekeri desaroyo di un otro maneho pa delinea e infraccionnan cu tin intrekking di permiso como consecuencia. Actualmente tin un gedoogbeleid vigente, den futuro lo tin un island round marine park unda departamento di gobierno lo aporta na FPNA pa haci e control necesario cu e conocemento di e materia.
Cu e presentacion di maneho nobo, Ministerio di Naturalesa, cu aprobacion den Conseho di Minister, lo cuminsa encamina e caminda legal na e departamento di Legislacion (DWJZ) pa asina formalisa e maneho.
“E sector di pesca ta mirando pasonan concreto pa engrandece e industria. Na un forma participativo lo inclui representante di cada arte di pesca den un Plataforma Nacional di Pesca y asina fortifica e arte aki cu ta parti di nos cultura y cu lo aporta inmensamente den e transformacion di pesca pa uno mas sostenibel teniendo na cuenta cu nos naturalesa y medio ambiente”, Arends a post riba su pagina di Facebook.
