(AP) — Un cargamento di SpaceX di fruminga, awacati y un brasa robotico tamaño di un humano a despega caminda pa Stacion Espacial Internacional (ISS) riba diadomingo.
E delivery – programa pa yega awe – ta e di 23 di e compania pa NASA den menos cu un decada.
Un raket Falcon recycla a despega den shelo prome cu salida di solo for di Centro Espacial Kennedy di NASA.
Despues di lansa e capsula Dragon, e booster di prome etapa a aterisa na e plataforma nobo di SpaceX riba lama, yama ‘A shortfall of Gravitas’. Fundador di SpaceX, Elon Musk a continua su tradicion di yama e navenan di recuperacion di booster den tributo di e escritor di ciencia ficcion Iain Banks y su serie Culture.
E Dragon ta transportando mas di 4,800 libra di suministro y experimento, y cuminda fresco incluyendo awacati, lamunchi y hasta ice cream pa e shete astronauta abordo di ISS. Girl Scouts ta mandando fruminga, cabaron y mata como suheto di test, mientras cientificonan di Universidad di Wisconsin-Madison ta mandando simia di cress, un yerba chikito usa den investigacion genetico. Muestranan di concret, celnan solar y otro materialnan tambe ta bay ta someti na gravedad cero.
SpaceX mester a laga algun experimento atras pa motibo di retraso pa motibo di Covid-19. Tabata e segundo intento di lansamento, despues cu e prome intento diasabra a fracasa den clima di tormenta.
