(AP) – SpaceX, e compania cu di CEO di Tesla Elon Musk a kita varios empleado involucra den un carta habri basa riba e biyonario su comportamento, segun reportahenan di media.
E reportahenan publica riba diabierna a cita un e-mail di Gwynne Shotwell, president di SpaceX ken ta bisando cu e compania a termina e empleo di ex empleadonan cu a crea e carta y circula esaki. E carta su escritornan a critica Musk pa accionnan cu nan ta bisa “ta un fuente constant di distraccion y berguensa pa nan, particularmente den simannan recien.”
New York Times ta e prome medio cu a reporta e terminacion di e empleadonan, basa riba informacion di 3 empleado familiar cu e situacion. E empleadonan no a keda nombra.
E no ta cla cuanto di e empleadonan a perde nan trabao, sinembargo Shotwell no a laga duda cu e compania ta kere nan a crusa un linea inaceptabel.
“E carta, solicitacionnan y proceso general a haci e empleadonan sinti incomfortabel, intimida y victima di bullying ademas di rabia pa motibo cu e carta ta pone presion riba nan pa firma algo cu no ta refleha nan opinion,” Shotwell a skirbi den su e-mail segun Times. “Nos tin demasiado trabao critico pa completa y no tin mester di e tipo di activismo aki.”
E acto a tuma luga riba diahuebs, e mesun dia cu Musk a dirigi su mes pa prome biaha na empleadonan di Twitter tocante e trato di 44 biyon dollar pa adkiri e servicio di red social. E compra ta den aire actualmente mientras cu Musk ta purba determina si Twitter tabata scondiendo e cantidad di cuentanan falso riba nan plataforma.
