Un raket Falcon 9 di SpaceX a despega for di Florida den shelo di marduga di diasabra, apenas dos siman despues cu otro di e raketnan di e compania a manda astronautanan di NASA, Doug Hurley y Bob Behnken na Stacion Espacial Internacional (ISS) den e historico prome lansamento di humano di SpaceX.
E compania a continua su lansamentonan algun dia despues di lansa e astronautanan, cu un lansamento di satelite Starlink, y awo a logra su prome lift comparti di Starlink, hibando 58 di su propio satelite broadband, hunto cu tres astronave pa observa Tera, pa Planet Labs.
E mision ta trece e cantidad total di satelite Starlink den orbita abou di Tera na mas di 500, mientras ta aumenta e flota SkySat di Planet Labs na 18. Starlink di SpaceX tin como meta pa eventualmente inclui decenas di miles di router den orbita, cu lo cubri Tera cu acceso broadband na internet, mientras SkySats lo yuda Planet Labs desaroya imagen di superficie di Tera.
E booster di prome etapa a bula anteriormente dos biaha, ambos riba cargo Dragon den mision di suministro pa ISS. A recupera esaki exitosamente bek na momento cu el a cay riba un droneship den ocean Atlantico menos di 10 minuut despues di lansamento.
