Space Camp, un programa educacional cu participacion di casi 1 miyon persona, incluyendo un decena cu a converti den astronauta of cosmonauta, a bisa ayera cu ta den peliger di cera permanentemente sin infusion di placa pa motibo di pandemia di coronavirus.
Parti di e US Space and Rocket Center na Huntsville, propiedad di estado, Space Camp a cera pa algun siman e aña aki y ta mancha pa atendencia abou desde cu a habri bek na juni cu capacidad limita, oficialnan a bisa.
Cu mayoria di su personal tipico recorta, y e fluho di studiante internacional y gruponan di scol reduci na nada pa herfst pa motibo di e virus, lidernan a tene un conferencia di prensa anunciando e campaña ‘Save Space Camp’.
Oficialnan ta spera di recauda sikiera $1.5 miyon den donacion cu nan ta bisa ta necesario pa tene e museo habri te october, fin di aña fiscal, y pa habri Space Camp na april. “Awo nos ta luchando pa sobrevivi”, segun John Nerger, presidente di e hunta estatal cu ta supervisa e centro. Dunadornan a duna casi $100mil dentro di algun ora di e anuncio.
Ubica den Marshall Space Flight Center di NASA, e museo ta conta cu exhibicionnan incluyendo un racket Saturn V autentico, e modulo di comando di Apollo 16, y un modelo full-size di un shuttle espacial. Studiantenan di Space Camp tin acceso na e area aki, ademas di lesnan y simulacronan di misionnan espacial.
Desde cu a habri na 1982, Space Camp a conta cu presencia di mas di 1 miyon hoben y adulto, y tabata inspiracion pa un pelicula na 1986 cu e mesun nomber. Dies persona selecta como astronautanan y dos kende a bira cosmonautanan a atende e camp, segun promotornan. “Space Camp ta e card mas visibel di Huntsville”, segun director di turismo di Alabama, Lee Sentell, kende a traha como marketing director pa e atraccion den su inicio.
Cu caha di gobierno bashi pa motibo di menos entrada di impuesto, lidernan ta spera cu corporacionnan cu ta parti di industria aeroespacial di nort Alabama lo haci donacion na e campaña pa recauda fondo. Pero Nerger a bisa cu e centro, cual ta autosuficiente y no ta ricibi placa di gobierno pa operacion, tambe ta contando riba donacion priva. “Nos djis no por afford pa un persona cu un capa bin rescata nos”, el a bisa.
