A crea Fundacion Space and Nature Aruba na luna di juni 2018.
Dia 27 di augustus proximo, e pais a bira miembro di International Astronomical Union (IAU) y door di e celebracion di 100 di existencia di e instituto aki, 182 pais ta participa pa duna un di e sistemanan estelar y su planeta un nomber, y Aruba ta participante.

Durante un entrevista cu Bon Dia Aruba a tene cu Jeremio Maduro, Presidente di Hunta Directivo di Fundacion Space and Nature Aruba, el a splica cu WASP cu ta nifica Wide Angle Search for Planets, cual ta un telescop cu su trabou ta pa saca potret di diferente parti di shelo durante un temporada largo.

El a duna di conoce cu door di compara e intensidad di luz di tur e potretnan di cada strea cu otro, por deduci si e strea tin un planeta of no. Si e strea a perde intensidad den un patronchi frecuente por deduci cu e ta perde luz door cu un planeta ta pasa su dilanti. Den caso di e Sistema WASP, e ta detecta planetanan cu ta grandura di Jupiter.

Wasp Project a cuminsa na 1999 y pa 2019 a descubri rond di 192 exoplanet. Name Exo Worlds ta e proyecto cu cual e personanan rond di mundo por duna un nomber na un planeta descubri. Aruba a wordo asigna e Sistema WASP-39 cu su planeta WASP 39B. Cu e oportunidad unico aki, henter comunidad Arubiano por duna un nomber na Papiamento pa e sistema estelar, cu lo nifica e prome evento di e fundacion den International Astronomical Union.

Maduro a comenta cu Space and Nature Aruba Foundation ‘lo haci su mayor esfuerso pa mantene e miembresia aki, cual ta pone Aruba su nomber riba e mapa mundial di ciencia’ y di mesun manera a bisa cu esaki ta nifica un reto, mirando e magnitud di e proyecto aki, sinembargo nan lo haci nan best.

El a duna di conoce cu si comunidad kier participa cu e nombramento di e planeta, lo por subi e website di e fundacion www.spacenaturearuba.com, unda lo tin un link pa lesa tur regla y durante proximo siman e persona lo haya un formulario, riba cual mester yena informacion di participante, nomber di e strea, nomber di e planeta, tema di nombramento y splicacion di e escogencia di nomber, cu no por tin mas cu 100 palabra.

Esaki tambe tin algun normanan:

  • E nombernan proponi mester ta di un obheto, hende of luga cu tin un nificacion cultural, historico of geografico pa hopi tempo y digno di ta asigna na un obheto celestial.
  • Dos nomber mester keda proponi: uno pa e exoplaneta y uno pa e strea cu e planeta ta orbita.
  • E dos nombernan proponi mester sigui e mesun tema. E tema nombra, cu ta describi con e nombernan ta relaciona cu otro, mester wordo resumi den un of dos frase.
  • Tur nomber proponi mester ta acompaña pa un citacion, splicando e nomber den no mas cu 100 palabra.

Jeromio Maduro a informa cu comunidad tin te cu dia 9 di october pa entrega e nomber. Despues dia 30, hurado lo scoge e nombernan riba cual e publico en general lo haya e oportunidad pa vota riba nan. Dia 13 di november Space and Nature ta entrega e nombernan cu mas voto na IAU y na final di december, despues cu IAU anuncia e nomber di tur e paisnan participante, Aruba tambe lo anuncia e ganado.

Asina mes, Maduro a finalisa bisando cu pa dia 5 di october lo tin nos evento Stargazing in the Park – Moon edition. Den e evento aki, e participantenan lo tin oportunidad pa mira e luna y lo tin lecturanan cortico pa esunnan cu ta interesa riba e tema aki.