Diabierna atardi Gobierno di Aruba a manda un “orde van maatregel” pa Sindicato di Polis Aruba (SPA) relaciona cu e accion cu e sindicato a tuma diabierna merdia. Manera ta conoci, SPA a bay plat diabierna for di 12or di merdia pa 2or di atardi como muestra di nan mal contento, despues di un reunion den cual Secretario di Estado, Sra. Alexandra van Huffelen, a informa SPA y otro sindicatonan cu no lo elimina e recorte salarial di 12.6%.

Hues a bay di acuerdo y a otorga e “orde van maatregel” cu Gobierno a manda pa SPA y a informa presidente di e sindicato, Sr. Rodney Solognier, cu si accionnan di protesta mester sigui di parti di polisnan, nan lo mester paga 100 mil florin pa cada dia cu nan tene accion.

Diasabra atardi Sr. Solognier, a informa durante un conferencia despues di a reuni cu nan miembronan – cu nan tabatin un reunion basta largo y nan abogado tambe tabata presente. “Nos a cumpli awe cu e reglanan cu nos mester cumpli pa e mantencion di e orde handhaving. Pero jammer genoeg cu desde awe SPA mester mantene su mes na regla, pasobra ayera nos a haya un orde handhaving indicando cu nos no mag di bay den accion mas. Y si nos bay den accion nos ta haya un boet di 100 mil florin di hues”, Solognier a bisa.

El a splica cu nan mester warda te dia e caso sumario mester bay corte y despues di eynan nan por sigui combersa. “Na e momentonan aki nos tin cu djis sinta warda e kortgeding bin, nos tin cu mantene nos mes na ordo sigui nos trabounan normal y wardando e dia”, el a agrega.

El a informa tambe cu ainda nan no a haya fecha pa e caso sumario y abogado di e sindicato lo mester check dialuna cu corte ki dia e caso sumario lo tuma luga, pero segun el a indica nan ta calcula cu muy posiblemente lo ta e siman aki mes.

Sr. Solognier a indica tambe cu e no a sinta cu Minister di Husticia, Sr. Rocco Tjon ainda tocante e topico aki, pero segun el a menciona e tin un afspraak cu Minister Tjon diaranson dia 23. El a bisa tambe cu Minister Tjon a manda un carta indicando cu nan tin cu sigui cu nan obligacionnan di trabou, pero segun e ta kere, esey tabata un carta a base di nomaliteit vorm.

Pa loke ta trata e parada nacional di luz cu Gobierno di Aruba conhuntamente cu Departamento di Cultura ta organisando pa dia 26 di februari, inicialmente el a menciona cu e polisnan no lo kier traha durante e parada. Pero den bista di e cambionan recien y e “orde van maatregel” presenta, nan mester labora normal ariba e dia si no nan ta core riesgo di ricibi e boet di 100 mil florin.

“Unico cos cu mi por bisa ta nos ta sigui den e lucha, pero den e formanan y e maneranan cu nos mester sigui. E forma cu nos a haci ayera (diabierna) desafortunadamente nos no por sigui mas. Nos tin cu sigui e lucha cu nos abogado den corte muy pronto y despues di esey nos lo wak kico ta e siguiente pasonan cu nos lo por haci of logra”, el a agrega.

Pa loke ta trata e “orde van maatregel”, un miembro di prensa a puntra si e ta wak e orde aki como poniendo “dictadura” riba sindicato. Sr. Solognier a indica cu nan tabata sper’e caba. “Nos tabata sa cu e ta bay bin. Nos a purba nos suerte y nos tabata sa cu e ta bin, tabata solamente wardando ki ora y ki momento”, el a bisa.

Sindicato SIMAR tambe tabata presente na e reunion diasabra atardi y segun Sr. Solognier a señala nan tabata t’ey simplemente como sosten pasobra SIMAR tambe ta bringa pa e mesun causa. “Si bo wak bon den ultimo temponan SIMAR, SEPPA, SPA y SADA, nos ta cuater sindicato uni den e lucha di 12.6%. Pero nos tur tin diferente tarea. Dus cada un di nos tin nos diferente formanan di lucha den corte, p’esey nos cada un a haya un kortgeding apart”, el a finalisa.