Sindicato di Polis Aruba (SPA) a bay mustra nan solidaridad durante e marcha cu sindicato SIMAR y SEPPA a organisa diaranson atardi. Presidente d SPA, Joselino Dirksz a declara na Bon Dia Aruba cu nan a yega di papia cu minister di Husticia, Andin Bikker, pero ya no por a haci mucho, pasobra decision riba reduccion di salario a wordo tuma caba.
Segun presidente di SPA, ora bo ta den mundo di sindicalismo semper mester mustra solidaridad na momento cu un sindicato ta pleita pa defende e derechonan di nan miembronan. El a trece dilanti cu diamars ultimo nan tabatin reunion, y nan por wak claramente cu nan coleganan di SIMAR y di SEPPA tabata eynan pa sostene e miembronan di SPA moralmente.
El a agrega cu den principio SPA su presencia den e marcha ultimo no tabatin nada di haber directamente cu loke enseñansa ta bezig cune. Pero si SPA a duna un respaldo moral pa sindicato SIMAR y SEPPA.
Encuanto nan reunion di diamars ultimo, presidente di SPA a aclaria cu niun rato nan a manifesta e dia ey. Nan tabatin un simpel reunion. Sinembargo tabatin coleganan cu a reacciona rabia pasobra nan tin tres siman cu ta wardando un contesta fiho di minister di Husticia. Te cu diamars a bin un contesta, pero e contesta tabata uno masha breve mes. “Eigenlijk e no tabata ta loke nos kier contesta riba dje fiho,” Dirksz a declara na e matutino aki.
E echo aki a conduci cu e miembronan di SPA a dicidi bin dilanti di Bestuurskantoor pa e minister trece dilanti personalmente su posicion. Presidente di SPA a laga sa cu cuerpo policial tin confiansa den minister di Husticia, y p’esey nan a reacciona, ya cu nan no ta kere cu mester a trata nan asina.
