E weekend cu a caba di pasa, den cual Mericanonan a observa Memorial Day, Aruba tabatin e placer di anfitriona un biaha mas e aña aki su edicion di Soul Beach Music Festival. Un weekend cu tabata yen di harimento, alegria, bon musica y conexionnan duradero cu a ser crea.

Soul Beach Music Festival ta mas cu un festival di musica. Pa e ultimo 22 edicion, e ta un experiencia cu ta crea di un manera fantastico pa tanto bishitantenan como e localnan, cu ta anticipa tur aña. E ta un luga unda bo por crea conexionnan nobo, amistadnan nobo, crea recuerdonan cu lo dura pa semper y nos bishitantenan ta haya un cas nobo leu di cas, cu e bonus di musica excelente y un experiencia maraviyoso.

E edicion di e aña aki tabatin algun di e nombernan mas grandi den tanto musica como comedia, cu actonan principal iconico manera Mariah Carey, Boyz II Men, Earthquake y DJ manera DJ Jazzy Jeff, DJ Frank Si, DJ Trauma, DJ Envy, DJ Aktive y DJ Outkast.

Diasabra a keda marca pa presentacionnan inolvidabel

Riba diasabra e audiencia presente a disfruta di un combinacion di musica local y sensacionnan internacional.

E acto di apertura e anochi aki tabata e gran grupo NFuzion, un banda local cu a capta e atencion di e audiencia cu nan ritmonan pegahoso, nan aura riba escenario y interaccionnan cu e publico. Nan a toca un gran variedad di canticanan stima ademas di introduci e parti di e audiencia cu no tabata local na musica cu un toque Arubano. E tabata un presentacion cu a pone tur hende presente baila.

E proximo presentacion di e anochi tabata Skip Marley, e nieto materno di e leyenda Bob Marley. Skip Marley, ken ta parti di e famia di reggae mas cu conoci cu ta inclui su mama Cedella y tionan Ziggy, Stephen y Damian, tin su propio zonido cu ta inclui tokenan di pop, rap y rock. El a cuminsa genera reconocimento despues di a participa den Katy Perry su hit “Chained to the Rythm,” cual el a sigui durante e siguiente añanan cu canticanan di su mes, incluyendo e mega hit “Slow Down” den colaboracion cu H.E.R., cual eventualmente tambe a ser inclui den su debut Higher Place e siguiente aña.

El a duna un presentacion electrico cu tabata mas cu mira un cantante. E tabata un experiencia cu a hiba e audiencia riba un biahe di goso sublime y descubrimento di musica nobo, y pa esnan cu no tabata conoce caba, el a deleita e publico cu un variedad di musica di Bob Marley cu un twist di Skip Marley. El a duna un presentacion cu lo ser marca den historia como un di e mihonan mira y a laga tur hende den audiencia pidiendo mas.

E acto principal di e anochi tabata e iconico Mariah Carey, un di e personanan mas spera di henter e festival.

Mariah Carey ta un autor, negociante, filantropo, productor y un artista/escritora ganador di premio. E ta e artista femenino cu e miho bentanan den historia cu mas di 200 miyon album bendi te cu dia di awe y 19 cancion den posicion #1 di Hot 100, cual ta mas cu cualkier solista den historia. Cu su habilidadnan vocal unico, cancionnan y talento den produccion el a yega na su status mas cu mereci.

El a duna un show cautivador cu a laga tur hende den e audiencia asombra cu su presencia y vocalnan grandioso. El a habri e anochi cantando un di su varios hit, hibando tur hende back den tempo a lo largo di su presentacion.

Carey tabata e ‘cherry on top’ cu a haci e concierto di diasabra anochi un momento iconico cu ningun di esunnan presente lo por lubida.