Sostenedornan di criptomoneda ta pusha pa amienda riba ley di infrastructura

(CNET) – Varios compania di criptomoneda prominente y su sostenedornan, incluyendo compania di venture capital, Andreessen Horowitz, compania di pago Square, y grupo di industria Blockchain Association, ta poniendo nan sosten tras di un amienda na e ley di infrastructura di $1 triyon cu tin como meta clarifica un provision relaciona na impuesto riba transaccionnan di criptomoneda.

E amienda bipartisano, entrega diaranson pa senadornan Ron Wyden, Cynthia Lummis y Pat Toomey, lo aclaria lenguahe den e ley relaciona cu ‘brokernan’ di criptomoneda pa esaki inclui solamente hende cu ta ‘conduci transaccionnan riba intercambionan unda consumidornan ta cumpra, bende of intercambia activonan digital’ y no ta rekeri reporta informacion pa otro actividadnan, manera mina, desaroya tecnologia di blockchain, of construi cartera di hardware.

“Nos ta comparti e preocupacion di e senadornan cu e provision existente cu ta regarda e tarifanan riba transaccionnan di criptomoneda ta demasiado amplio y ta bay abarca no-intermediarionan, manera esnan cu ta validad rednan y desaroyadornan di software, y lo horca innovacion door di impone loke lo ta un rekisito di reportahe cu cual no por traha riba e gruponan aki”, segun un carta manda na lider di mayoria den Senado, Chuck Schumer, y lider di minoria Mitch McConnel, for di Marc Andreessen, Ben Horowitz y otro partnernan di e compania di venture capital. Nan a agrega cu e amienda ta e ‘solucion corecto pa adresa e preocupacionnan aki den un manera simple’.

E provision di criptoimpuesto a aparece den e ley di infrastructura como un manera pa contraresta $28 biyon di e casi $550 biyon den e pakete di gasto nobo riba caminda, brug y otro proyecto di infrastructura, segun Roll Call. E legislacion ta alinea cu cambionan anteriormente proponi pa Tesoro Mericano, yamando pa transaccionnan involucrando mas di $10mil den criptomoneda mester reporta na IRS. Esaki ta e mesun limite di reporte pa depositonan di cash.

“Nos amienda ta haci cla cu reportahe no ta aplica na individuonan desaroyando tecnologia y carteranan di block chain”, Wyden a bisa den un comunicado di prensa. “Esaki ta bay protege innovacion Mericano mientras na mes momento ta sigura cu esnan cu ta cumpra y bende criptomoneda paga e impuestonan cu nan ta debe caba.”

E ley di infrastructura por bay pa votacion e siman aki caba, dependiendo riba e debate tocante amiendanan den Senado. Si e pasa, e ta bay pa Congreso pa amiendanan adicional.