Riba sugerencia di Secretario di Estado pa Asuntonan Interno y Relacionnan di Reino, Raymond Knops, gabinete Hulandes a aloca 15.2 miyon euro aidcional pa e programa di ayudo di cuminda na Aruba, Corsou y St. Maarten.
E residentenan di e tres isla a enfrenta retonan grandi desde inicio di e pandemia di Covid-19 y e subsecuente perdida di turismo. E problema di pobresa a aumenta riba e islanan.
Knops a declara: “E gabinete semper ta basa riba e principio cu Hulanda no laga personanan mas vulnerabel desampara. Durante mi ultimo bishita di trabao mi a experimenta con duro e situacion ta den algun luga dentro di nos Reino. Ta importante pa continua e programa di ayudo di cuminda den e proximo periodo.”
Desde mei 2020, gabinete Hulandes a pone fondo disponibel pa ayudo di cuminda na Aruba, Corsou y St. Maarten. Actualmente, un total di alrededor di 80mil persona ta ricibi ayudo di cuminda, cual ta posibel danki na Hulanda.
Cruz Cora ta coordina e programa di ayudo di cuminda. Pero un transicion na un forma mas structural di e programa ta na caminda, bao responsabilidad di e tres pais. Cu e recursonan aki, ayudo di cuminda ta garantisa te dia 1 di juli 2021.
