KRALENDIJK (Ret Karibense) – Weekend pasa nan a cuminsa cu un peticion pa drecha caminda. Mas cu 2700 a firma caba, mustrando cu pueblo ta fada cu e mal estado di e camindanan. Tambe a firma 700 hende riba papel.
E peticion yama Fix our road a ricibi dentro di 24 ora 1.500 firma online y awor manera menciona tin mas cu 3000 firma. E iniciado Henri Verhoef kende ya aña pasa a hala hopi atencion cu su protesta di flor, ta reacciona: “E ta algo cu ta biba bou di hende. Pero esey ta logico. E ta un problema di nos tur.”
E cantidad firma lo representa 15% di e populacion sinembargo e iniciado no por garantisa cu e firmanan online si tur e personanan realmente ta bibando na Boneiro.
Aña pasa el a protesta, butando flor di plastic den buraconan den caminda. El a haya hopi atencion sinembargo no a logra mucho. Sr. Verhoef ta bisa cu awor cu e peticion e politiconan si ta reaccionando. “Ya m’a papia capa cu deputado James Kroon.” Su intencion tabata pa awe duna e peticion na secretario di estado Hulandes Raymond Knops encarga cu asuntonan di Reino. E secretario ta bishitando e isla.
Wega entre Boneiro y Hulanda
Drechamento di e camindanan ya a bira un wega entre Boneiro y Hulanda di ken ta responsabel. E problema aki ta algo di añanan caba sinembargo e ultimo simannan e situacion a deteriora mas. Asina cu nada di mantencion ta pasa tanten cu Boneiro y Hulanda ta pleitando. Na october aña pasa deputado di Boneiro Kroon a asumi responsabilidad, esta cu Boneiro mester drecha e camindanan malo. Pero e tambe a indica cu pa logra esaki mester sosten di Hulanda. El a bisa tambe cu tin un plan cla y cu nan ta spera cu na februari e aña aki nan lo por cuminsa cu mantencion.
Durante su bishita luna pasa, secretario Knops di Hulanda a bisa cu e placa tambe t’ey pero cu ainda falta e plan di e colegio di gobernacion di Boneiro. Gezaghebber di Boneiro Edison Rijna recientemente a bisa cu e plan lo ta cla dentro di un par di siman.
Responsabel ora accident fatal
Pero te ainda nada concreto a pasa. Y pa motibo di e yobida ultimo simannan e camindanan hasta a bira mas peligroso. Pa motibo di esey, sr. Verhoef a cuminsa cu e peticion dirigi na deputado Kroon y secretario Knops.
Partido den oposicion MPB a tuma e peticion pa urgi sr. Rijna como ‘factor stabiel den e gobernacion’ pa tuma e coordinacion di e plan. E partido a trece dilanti cu tin un veredicto di Hoge Raad unda ta dirigi un gemeente Hulandes pa para responsabel den caso tin un accidente fatal pa motibo di camindanan mal manteni.
