Ayera mainta den corte, hues a dicta sentencia den caso penal Quetzal. Den e caso aki, sospechosonan Y.J.R. y E.J.D.S. ta ser acusa di contrabanda di persona, of mensensmokkel, durante e periodo di 10 pa 11 di december.
Den luna di december ultimo, a tuma luga e tratamento di e caso den corte, na unda fiscal di Ministerio Publico (OM) a pidi un castigo di prison incondicional di siete aña contra ambos sospechoso pa trafico di hende, cu a resulta den morto di cuater persona.
Den su veredicto hues a dicta cu ambos sospechoso ta ser declara culpabel di contrabanda di hende. Capitan di e boto, e sospechoso E.J.D.S. a ricibi un castigo di seis aña di prizon incondicional kitando e tempo cu el a sinta caba. E sospechoso Y.J.R., ken ta e organisador, a ricibi un castigo di siete aña di prizon incondicional kitando e tempo cu el a sinta caba.
Tabata 11 di december 2023 ora cu Wardacosta a informa, mediante un comunicado di prensa, cu a haya un notificacion di Cuerpo Policial di Aruba indicando cu personanan indocumenta a logra subi tera den e area di Vader Piet.
Dos persona a duna un declaracion na un ciudadano local splicando cu nan a tabata bin direccion Aruba den un lancha pero cu esaki lo a bolter riba lama. Mesora Wardacosta a saca unidad di tera pa bay tira un bista den e area. Na yegada na e area panort di Aruba e agentenan di Wardacosta a detecta dos curpa sin bida den lama.
A entrega e dos curpanan di hende muher sin bida na Cuerpo Policial di Aruba.
Despues di esaki Cuerpo Policial di Aruba a dirigi nan helicopter y Wardacosta tambe a dirigi su patruyanan di tera pa sigui cu e buskeda pa mira si ta encontra mas persona. Durante e buskeda dialuna durante dia, a mira un curpa mas sin bida riba lama, pero no a logra saca e curpa aki for di lama. Den oranan di anochi, helicopter di Wardacosta a saca un curpa di hende homber sin bida for di lama na parti nort di Aruba relaciona cu e caso aki.
Siguiente dia, diamars 12 di december parti mainta a bolbe haya un curpa sin bida den lama. Autoridadnan a logra saca e curpa y a entrega e na Cuerpo Policial di Aruba pa por sigui cu e investigacion. Den total a haya 4 curpa sin bida riba lama relaciona cu e caso aki.
Relaciona cu esaki UMM a cuminsa un investigacion penal di e hendenan posiblemente envolvi den e caso di mensensmokkel aki. Den luna di mei aña pasa a detene un persona cu tabata wordo sospecha di a yuda den e biahe di contrabanda den anochi di 10 pa 11 di december 2023. E investigacion a sigui y OM a detene otro persona cu tabata envolvi den e caso.
Manera e caso aki tin varios mas caminda hendenan ta tuma un decision den momento di desesperacion pa subi un lancha den speransa cu nan por yega Aruba y purba nan suerte pa un miho calidad di bida. Sinembargo, e biahe ta expone nan na peligronan hopi extremo. E botonan no ta semper adecua pa crusa lama y sa sucede cu lama ta hopi bruto. Den e caso aki, e prijs cu e personanan a paga pa e biahe tabata nan bida.
Den luna di juni 2023 tambe dos persona indocumenta a perde nan bida den lama purbando di drenta costa patras di Vader Piet, mientras cu otro tres a ser rescata. E mainta di 12 di juni personal di Fundacion Parke Nacional Aruba a bati alarma na Central di Polis cu un hende homber cu ta papia Spaño a yega na un trahado di nan, bisando cu marduga el a drenta Aruba ilegalmente y cu dos di su compañeronan ta mal pega bao baranca.
Central di Polis a manda patruya, brandweer, personal di kustwacht y ambulance na e sitio. Na e sitio en berdad patruya ta informa cu nan ta wak dos hende homber bao di e baranca, pero cu e situacion di e lama ta hopi malo y dificil pa nan mes rescata nan. Personal di helicopter di Cuerpo Policial a logra maniobra y saca e dos homber aki. Mesora e personal di helicopter a sigui busca y un poco mas panort ta wak dos curpa sin bida ta drief y basta purun preto.
Pa e helicopter di polis tabata practicamente imposibel pa saca nan. Mesora personal di bombero den bon coordinacion ta logra baha y saca e dos curpa sin bida plus e purun cu probablemente tin droga aden.
