(NLTimes) – Criminalnan cibernetico hoben na Hulanda ta cada biaha mas arma, polis y Ministerio Publico (OM) a bisa den un rapport nobo tocante e desaroyonan di crimen cibernetico.
Polis regularmente ta confisca armanan di candela, municion y explosivonan for di sospechosonan hoben di crimen online, algun ken ta menor di edad. Mita di sospechosonan di crimen cibernetico ta mas hoben cu 25 aña.
Segun Koen Hermans, e fiscal di crimen cibernetico nacional, personanan hoben activo den e comercio di droga tambe a descubri crimen cibernetico tambe ta un manera di genera placa lihe. “Ora cu bo ta papiando tocante mucha hombernan di 16, 17 aña cu simplemente ta cumpra tur cos ademas di panel pa phishing of programa pa fraude. Nos ta mira cada biaha mas y mas mescla entre crimen tradicional y crimen cibernetico,” el a conta NOS. E muchanan aki hopi biaha ta cana rond arma, introduciendo arma di candela den e mundo di crimen online.
Sinembargo tambe tin criminalnan cibernetico cu no ta involucra den e comercio di droga y ta armando nan mes, segun Hermans. “Nos a haya un programador hoben cu un arma bao di su stoel. El a genera hopi placa via actividadnan criminal y a bisa cu e mester por proteha su mes si algo pasa.” OM no por bisa exactamente cuanto criminal cibernetico tin arma, sinembargo polis y fiscalnan cu ta lidia cu crimen cibernetico a ampliamente mira un aumento.
E autoridadnan ta hopi preocupa tocante e edad hoben di e sospechosonan di crimen cibernetico. Mita ta mas chikito cu 2, y un cantidad significante ta menor di edad. “Recientemente mi tabatin un caso di un sospechoso cu a programa panel phishing y panelnan sumamente bon. Nos a pensa inicialmente cu nos tabatin e persona incorecto, sinembargo a resulta cu berdaderamente e tabata un mucha homber di 14 aña,” Hermans a conta. Polis tambe un biaha a gara un mucha di 12 aña ta haci atakenan di DDoS na scolnan. “Na e edad di 17, el a resulta di ta miembro di un organisacion criminal cu a extorciona companianan,” Hermans a bisa.
OM y polis a yama pa un strategia mas amplio pa cibercrimen, cu municipalidadnan, scolnan y companianan cu ta haci mas pa evita cu hobennan ta comete crimennan online.
E rapport a nota algun cambio den crimen cibernetico. Ademas di criminalnan hoben di droga buscando manera di comete crimen online, e autoridadnan tambe a conta cu criminalnan cibernetico no ta usa atake di ransomware pa extorciona companianan. Despues di e aumento di atake di ransomware den añanan recien, companianan a cuminsa crea miho backup. Na luga di esaki, criminalnan ta drenta nan server, horta nan data y ta menasa di haci esaki publico of bend’e si e compania no paga.
Otro desaroyo impactante ta cu e sospechosonan ta cada biaha combinando informacion di leak di data pa obtene e miho perfil posibel di nan victima, cual ta permiti nan haci estafanan mas convincente. Dataset cu informacion manera hobby y mascotanan ta bendi pa mas placa. E rapport ta menciona tambe un homber cu a ser sentencia na 4 aña den prizon den november a causa di comercia cu data horta. E tabatin 4,000 base di dato diferente cu miyones di data personal. Segun e autoridadnan, e ta posibel cu e tabatin data pa cada persona Hulandes.
