Pa medio di un comunicado di prensa, Cuerpo Policial ta informa lo siguiente:
Diabierna pa 4:00am Atraco Team di Cuerpo di Polis Aruba (KPA) a sali caya pariba di brug buscando sospechosonan envolvi den casonan di atraco brutal riba nos hende grandinan. “Manera ta conoci, tin un temporada cuminsando dia 31 di december pa awor, cu tabatin atraconan riba hende grandi combina cu maltrato. Atraco Team di Polis a traha hopi duro y mirando tur e tipnan cu a drenta por a logra detene sospechosonan awe madruga na dos cas”, asina Lilliana Rasmijn, Vocero suplente di Polis a bisa.
Polis ta sigui informa cu tabatin entrada na dos cas. E prome tabata na Dr. Scheapmanstraat unda a haya e prome sospechoso di inicial D.B. Despues a sigui pa Seroe Largoweg unda a detene e di dos sospechoso di inicial K.P. “Un grupo grandi di Polis y Recherche a presenta pa haci e buskeda den cas pa asina mira si por haya mas prueba riba e personanan aki. Atraco Team a traha incansablemente riba e casonan aki pa resolve e atraconan pariba di brug”, asina Liliana Rasmijn a vocifera.
Total Team di Aresto di Polis a drenta cas na dos adres, pero pa siguridad a bay e casnan na banda pasobra e personanan aki sa frecuenta otro banda di cas tambe. “Na e prome cas a drenta un adres y na e di dos cas na Seroe Largoweg a drenta dos cas. E accion di Atraco Team tabata fructifero”, el a enfatisa. E grupo di polis hunto cu team K-9 y otro departamentonan a keda eynan pa haci mas investigacion. “Esaki ta e prome dos sospechosonan. Nos ta kere cu tin mas. Nos a cuminsa detene nan awe mainta y e caso ta bay sigui. Kiermen awor cu a gara e dos nan aki y pa medio di mas investigacion, e lo por bay bira mas persona”, di acuerdo cu Lilliana Rasmijn.
Ta pidi pa pueblo sigui yama na Tiplijn 11141. “Nos a ripara cu hopi biaha nos ta yega na e personanan aki pa medio di e tipnan valioso cu pueblo ta duna. P’esey no ta trabao di Polis so, pero pueblo tambe cu semper ta informa nos y duna nos tipnan valioso.”
