Hoben Salman Abedi, 22, a wordo identifica como esun tras di e explosion na Manchester Arena cu a mata 22 persona y herida 119 durante concierto di Ariana Grande na Inglatera. Identidad di Abedi a wordo revela despues cu gruponan di polis a invadi su cas na Fallowfield, Manchester, segun reportahe di The Sun.
Agentenan di MI5 y polis anti-terror ta trahando oranan largo sin stop pa purba wak si Abedi tin algun conexion cu gruponan terorista. Nan kier wak si ta e hoben mes a traha e obheto
cu a causa e explosion of si tin algun otro persona tras di esaki.
Hopi chens cu tin otro atake na caminda
Britania ta preparando pa un otro posibel atake terorista na caminda. Nan a hisa nan nivel di menasa for di “severo” pa “critico” despues di e explosion ayera na Manchester Arena. Militar di Britania ta presente pa asisti polis segun prome minister Theresa May a bisa awe mainta. A base di informacionnan di awe, ta conclui cu por tin un otro atake pronto.
