Den cuadro cu detencion recien di e sospechoso primario Jairo Chalgut den e caso di asesinato di hoben fam Sierra na De Vuyst, a wordo presenta dilanti hues comisario ayera mainta.
Manera nos a publica ayera, e sospechoso a wordo deteni a base di nombernan cu a wordo duna na autoridadnan. Ministerio Publico tambe a opta pa informa un poco riba e procedura y e investigacion cu a conduci na e detencion.
Procurador General Alexander Van Dam a informa cu ta asina cu Instituto Forensico di Hulanda (NFI) a analisa e profiel di DNA di e sospechoso. Ora cu a compara esaki cu DNA haya na sitio di e crimen a constata cu esaki tabata concorda cu otro.
Banda di detenido
Sinembargo OM ta consciente cu den nan experiencia, hopi biaha ora determina cu sospechosonan nan DNA of otro informacion manera fingerprint ta concorda cu algo riba sitio di crimen, sospechosonan sa bin cu otro declaracionnan. E declaracionnan aki tambe ta yuda sigui e proceso di interogacion pa haya sa si tin mas persona cu mester wordo deteni. Alabes ta keda importante pa scucha banda di e sospechoso, pasobra OM no tabata presente na e sitio pues no por determina tur cos basa riba declaracionnan di otro persona.
E proceso
Ora un sospechoso wordo presenta dilanti un hues comisario esaki ta un di e stapnan primario pa asina determina si e investigacion cu persecucion publico, esta OM, ta hibando dilanti ta cuadra cu ley, si e ta bayendo na ordo y si ta necesario pa sigui.
E proceso cu ta canando actualmente ta un di e prome stapnan den e sistema di detencion cu ta vigente na Aruba. Pa awo e detencion a wordo prolonga pa 8 dia. Despues di esaki hues comisario lo determina otro siman si lo sigui e proceso di detencion. Ministerio Publico ta subraya cu ta percura pa procesonan di detencion wordo impone riba un persona solamente ora esaki ta necesario, mirando cu ta algo ‘hopi pisa’.
Yamada pa colaboracion di comunidad
Manera nos a publica ayera, OM tin mester di mas persona cu lo tabata presente durante e incidente aki pa nan por sigui haci nan trabou di haya tur e sospechosonan. Sr. Van Dam no kier a bay den detaye pa delinea cuanto detencion tin actualmente, pa asina no stroba e investigacionnan.
KIA
Pa loke ta trata cera un persona tras di bara, procurador general ta enfatisa cu semper ta percura ora mester traspasa un detenido na KIA, ta tene cuenta cu siguridad di otro personanan na KIA y tambe cu e siguridad di trahadonan di KIA mes.
Esaki ta wordo considera tambe por medio di un evaluacion personal riba e comportacion di e persona, pero tambe si por ehempel den un cel cercano tin un persona cu ta parti di un gang opuesto, lo percura pa no causa problema innecesario, segun sr. Van Dam.
