E caso ta trata di e dama di nomber Leidy Johana Salazar, ken ainda ta desaparecido despues cu dia 22 di maart ultimo a sali cu boto for di Puerto Escondido, Venezuela pa Aruba, pero nunca el a yega. Apart di esey un caso nobo a nace cual Ministerio publico a denomina Salasia.

Tratamento di e caso proforma

Ayera Bon Dia Aruba tabata presente den corte pa e caso proforma di traficacion di hende, unda e sospechoso principal R. Stamper y co-sospechoso R. Laveist ta acusa oficialmente di traficacion di hende den e caso specifico di Leidy Johana Salazar, ken a desaparece dia 22 maart 2023 ultimo biniendo for di Venezuela y cu te ainda te desaparecido.

Na salida di tratamento di nan caso, Stamper y Laveist a haci un gesto cu nan man dirigi riba e redactor di Bon Dia Aruba, sin sa cu ki intencion. Mientras tanto, e gesto aki no lo intimida nos redactor mirando cu e corant aki ta esun cu a trece publicamente e noticia y gespreknan di Stamper.

Di e caso aki, a nace otro investigacion penal bao nomber Salasia, unda e dos persona aki ta acusa di ta autor principal di traficacion di hende.

Sospechoso Principal R. Stamper den caso di Lady Johana Salazar

Den e gesprek cu Bon Dia Aruba a publica di Stamper dia 27 di april ultimo, un dia prome cu su detencion, el a declara cu su prome contacto cu Salazar tabata den awa teritorial di Venezuela, na unda pa evita cu Kustwacht por a wak nan cu radar di Aruba ora nan tabata haci contacto cu otro, nan a tira Salazar cu un boei blauw na awa pa despues Stamper por pasa y piki e. Ora Stamper a piki e for di lama, el a wak caba “cu Johana no por landa. “Ora m’a carg’e y hink’e den mi boto.”

Despues el a conta cu nan a coy direccion pa Aruba –Johana cu Stamper so tabata riba e boto. E tabata sa caba cu Kustwacht tabata wardando riba nan unda su boto semper ta para den Colony. Segun el a sigura, Salazar a bula for di e boto 100 meter for di Baby Beach. E ta e ultimo persona cu a wak Salazar cu bida y te na e momentonan aki e ta desapareci.

Co-sospechoso R. Laveist den e caso di Leidy Johana Salazar

Dia 26 di april ultimo, e Arubiano R. Laveist a confesa publicamente den diferente medio local cu el a haci un prome intento di busca Salazar na januari, pero esey a fracasa. Tabatin palabracion, plan y transaccion financiero pa trece Salazar Aruba.

Laveist a conta cu na januari el a haya un yamada di un persona cu alias “Fiqui,” ken a puntra si Laveist por busca Salazar na Venezuela. Despues di 1 siman nan a topa otro dilanti un restaurant na Playa y segun el a sigura, nan a haci un areglo pa busca Salazar dia 19 di januari. E prome intento pa busca Salazar a fracasa unda Laveist ta bisa cu e si a sali pa bay Venezuela, pero e otro personanan nunca no a yega, pa motibo cu lama tabata hopi bruto y segun Laveist a sigura, practicamente e la perde su biahe. A pasa 2 luna cu Laveist a dicidi e no por busca Salazar mas debi cu el a fractura su columna y e no por a core boto mas.

Den esaki, el a bisa cu R. Stamper ta e persona cu a busca Salazar na mita di caminda unda e boto di Venezuela a topa cu R. Samper, y Salazar lo a bula for di boto pa motibo cu Kustwatch casi tabata intercepta e boto.

Caso Salasia – traficacion di persona

Ayera, durante tratamento proforma Ministerio Publico ta anuncia otro caso nobo di traficacion di persona cu e mes un sospechosonan R. Stamper cu R. Laveist, pero den e caso specifico aki nan ta sospechoso principal y ta acusa R. Stamper cu R. Laveist di ‘Mensen Smokkel.’

Mensensmokkel, traficacion di persona, ta un termino usa pa describi circunstancianan unda ilegalmente y di forma organisa ta trafica persona a traves di fronteranan internacional. No solamente e ta castigabel na nivel internacional sino na Aruba tambe, unda e ta hancra den Art. 2:154 di Codigo Penal di Aruba. Den esaki e castigo por varia di 4 aña di prison, multa di categoria 4 te cu 15 aña di prison of multa di categoria 5 si e trafico di persona tin como resultado e morto di e persona.

E caso aki ta bay ser trata tambe hunto cu esun di Leidy Johana Salazar dia 10 di november proximo.

Nota di redaccion: Den e caso aki tin un otro sospechoso di fam De Ponte hunto cu R. Stamper y R. Laveist pero no tin mucho informacion den cua di e 2 caso e ta.