A traves di un comunicado di prensa, Korps Politie Aruba (KPA) a informa cu a detene e sospechoso di a pinta graffiti “no more hotels” na e rotonde cu e obra di arte di artista Arubiano Gilbert Senchi, “Mama Driekiel.”
Segun e comunicado ta indica, diabierna 29 september den oranan di madruga un patruya di polis tabata na altura di Amsterdam Manor. Yegando cerca na e rotonde e patruya di polis a ripara cu desconocidonan a haci graffiti riba e muraya na unda recien a pone e escultura di turtuga.
Ta asina cu polis di biaha a informa central di polis. Na su turno, central di polis tuma contacto cu esnan encarga cu e escultura en cuestion. Recherche a wordo poni na altura, na unda a cuminsa di biaha cu un investigacion.
KPA a informa cu diamars 10 october recherche a detene e homber N.A.I.M. di 27 aña y nacionalidad Hulandes relaciona cu e caso di destruccion y no ta descarta cu lo por tin mas detencion relaciona cu e caso aki.
Den un articulo publica den edicion di dia 30 di september di Bon Dia Aruba, ta menciona cu e obra aki di e artista Arubiano Gilbert Senchi tabata protagonista y simbolo di protesta cu ta mustra un exigencia na Gobierno di Aruba pa stop di construi mas hotel riba e isla, debi cu ta considera cu tin suficiente.
Igualmente turista tambe a trece e punto aki dilanti pa loke ta trata e construccion di Secret’s Hotel, unda entre otro, nan ta señala cu e hotel aki “ta bay daña e zona trankil cu tin den area di Colony y ta bay bira un otro Palm Beach cu tin suficiente turismo caba.” Esaki ta algun di e comentarionan di turistanan.
Pa otronan esaki tabata un acto cu no por laga un banda, debi cu vandalismo cometi contra e obra cu por afecta Aruba como isla turistico. “Hopi tristo pa mira algun hende ta vandalisa obranan publico pa transmiti nan mensahe. E hendenan aki no ta consciente cu nos ta biba y depende di turismo! Un acto inaceptabel y condenabel,” tabata e reaccion di minister di Turismo, Dangui Oduber ariba e acto aki.
Minister di Cultura y Finanzas, Xiomara Maduro tambe a duna su opinion tocante esaki y a bisa cu “nos no mester boicotia nos pais. Tin diferente manera pa expresa, pero esaki no ta esun corecto. Ban balora tur esfuerso cu ta wordo haci na bienestar di Aruba.”
Recientemente SNBA a organisa un accion di firma “Say Yes to Secrets” cual segun e organisacion a demostra e apoyo grandi cu pueblo tin pa e construccion di e hotel cu un cantidad di firma cu a surpasa cinco mil firma.
