Ministerio Publico (OM) pa prome biaha a trece dilanti Hues un sospechoso di download pornografia infantil. Durante investigacion a haci uzo di e programa Child Protection System.

Segun e investigacion, e sospechoso tabata den posesion di 25.745 file digital di pornografia infantil cu el a download, tanto potret como video. Dia 29 di november ultimo e sospechoso a presenta dilanti Corte, y a ricibi castigo di 18 luna den prizon, di cual 10 luna ta condicional.

OM a pidi un castigo di 24 luna den prizon, di cual seis condicional cu un periodo di prueba di dos aña y supervision di reclassering cu terapia psicologico. Un castigo condicional ta nifica cu ta otorga esaki pero no ta cumpli cune, tanten cu e persona condena no comete un delito di nobo.

Den e investigacion a yega na cuatro sospechoso den total, kende a download pornografia infantil. E tres otronan mester presenta dilanti Hues den 2020, pero e fecha exacto ainda no ta conoci.

Despues di interogacion, a stop e detencion preventivo di e tres den espera di nan huicio. E investigacion ta un colaboracion entre OM, Jeugd- en Zedenpolitie y Recherche Samenwerkingsteam (RST).

E programa Child Protection System cu a uza den e caso aki, ta presenta su mes como un usuario cu ta participa den mira varios rednan ‘peer-to-peer’ manera eDonkey, BitTorrent y Gnutella, OM ta splica. Cu esaki, usuarionan por mira file di otro y comparti esakinan cu otro. Ora haci uzo di un red asina pa download un imagen, esaki na mes momento ta ser upload, pa asina e usuarionan sigui alimenta e red.

Segun OM, varios servicio di investigacion rond mundo ta haci uzo di e programa aki pa investiga hende cu ta download y comparti pornografia infantil. Child Protection System ta evalua y clasifica e material, pa asina agencianan di investigacion den otro paisnan por mira esaki. Nan ta mira na final e material evalua.

Ta registra e actividadnan pa cada IP-adres, un codigo cu cual cada computer ta haya su propio codigo segun Internet Protocol, pues ta mara na ubicacion. Cu esaki, a bin dilanti IP-adres di Aruba cu tabata download pornografia infantil. Den periodo di 27 augustus 2018 te cu 23 di april 2019, a tuma luga varios momento di download cu diferente IP-adres di Aruba, segun OM. Despues di 28 di september a busca bou di e termino PTHC (pre teen hardcore), cual ta un termino hopi comun pa potret di pornografia infantil. E tempo ey a download 250 file di pornografia infantil. A base di esaki a cuminsa un investigacion bou nomber Azul.

Investigacion y observacion

Na Aruba ta cambia e IP-adres di cable cada 24 ora, y e IP-adres ASDL cada 48 ora. Un cantidad enorme pa investiga, segun OM. A base di e buskeda di esaki, OM a yega na e informacion cu ta pertenece cu e IP-adresnan en cuestion for di proveedor Setar. Mediante observacion, investigacion di e trafico riba e red, y comparacion di varios dato, a yega na final na e sospechoso en cuestion.

Dia 4 di juni ultimo a yega na e adres corespondiente na e IP-adres di e sospechoso. Aki a tuma varios aparato den beslag, bou di cual un hard drive, laptop, celular y 18 USB stick. A aresta y interoga e sospechoso e mesun dia. El a reconoce cu durante cu a download pornografia infantil durante cinco pa seis aña, algo cu OM ta considera probabel mirando cu tabatin 25,745 file. Cu esaki tambe ta papia di un custumber di posesion di pornografia infantil. Ademas ta papia di uzo di un red peer-to-peer den cual tabata comparti e file cu otronan, cual tambe ta castigabel.

OM a bisa cu a base di tecnologia y declaracion di e sospechoso, a keda demostra cu tin un base legal y convincente cu e sospechoso a download, posee y comparti material pornografico di mucha y cu e sospechoso a haci un custumber di esaki. Door di download y pone e material aki den disponibilidad di otronan, e sospechoso tambe a contribui na e abuso di muchanan rond mundo pa crea pornografia infantil, segun OM a conclui.