(NLTimes) – Polis a aresta un homber di 55 aña di edad na Amsterdam riba diamars, bao sospecha di a comete asesinatonand urante e Guera Interior na Surinam, un guera civil entre 1986 y 1992.
Ministerio Publico ta acusa e homber – un Hulandes naci na Surinam – di crimen di guera. E ta sospecha di a asesina varios civil na 1987. E homber a presenta dilanti hues magistrado riba diabierna, kende a extende su detencion preventivo cu 14 dia.
Durante e Guera Interior, Ehercito Nacional Surinameño dirigi pa Desi Bouterse a bringa contra e Comando di Selva di Ronnie Brunswijk. Centenares di civil a wordo asesina, y decenas di miles desplasa.
Segun Ministerio Publico, e homber aresta ‘a indica di varios manera’ cu e tabata miembro di Infanteria di Ehercito Nacional di Surinam e tempo aya, y cu e tabata pertenece na e commandos. El a bisa hende cu el a asesina varios persona na juni 1987. Despues di un reportahe di esaki, Team di Crimen Internacional di polis y Ministerio Publico a cuminsa un investigacion.
Polis y e hudiciario ta continuando e investigacion. Nan ta buscando principalmente splicacion tocante e accionnan di ‘limpiesa’ di Ehercito Nacional Surinameño den area di Brokopondo na juni 1987, den cercania di brownsweg. Den e accionnan aki a asesina civilnan, segun Ministerio Publico.
Ministerio Publico ta investigando e caso como un crimen di guera pasobra mata hende cu no ta participa den e bringamento (mas) ta contra e ley humanitario di guera. Sospechosonan cu tin nacionalidad Hulandes of ta na Hulanda por keda enhuicia eynan.
