Sospechoso den caso Olde Molen a entrega su mes na polis

Segun informacion di Cuerpo Policial, e sospechoso den caso recien di asesinato na Olde Molen, Erick Arturo Minguel Junior Schneiders, 22, a caba di entrega su mes na warda di polis dialuna. Mas cu esaki nos no a haya for di Cuerpo Policial. Investigacion ta continua.

Orden di captura
Via peticion di Fiscal di Ministerio Publico, tin orden di captura di e sospechoso Erick Arturo Minguel Junior Schneiders, conoci tambe como Minguel. Naci riba 29 December 1994, biba na Meiveld 33 y/of Piera Plat 54 A Aruba. E sospechoso ta arma y peligroso. Su detencion ta basa riba articulo 2:262 c.q. 2:259 di e wetboek van Strafrecht Aruba, y  Art 3 Vuurwapenverordening.  Cualkier persona cu sa algo ta pidi pa por fabor tuma e medidanan di cautela necesario y no hinca nan mes den peliger. Djis yama sea central di polis riba 100 of yama e tip lijn di polis cu ta 11141.

Version policial di tiramento Olde Molen
Diadomingo madruga pa 4:28  central di polis ta haya un yamada na unda na prome instante ta bisa cu lo tin tiramento banda di Olde Molen. Ta manda patruya di biaha na e sitio . Na yegada patruya di polis ta topa cu un hende homber drumi abao y cu varios tiro na su curpa riba e parkeerplaats di e club. Di biaha a pidi pa ambulance cu urgencia ya cu e persona no tabata duna señal di bida.  Ambulance ta yega na e sitio, pero no por a haci nada mas pa sr. De Palm. Dokter a constata morto pa 5:30 anto fiscal a laga confisca e curpa.

Click aki pa lesa un articulo anterior cu nos a publica riba e caso aki