(AP) – E homber cu a describi su mes como un “gangster” ken segun polis y fiscalnan a orkestra e asesinato di Tupac Shakur na Las Vegas den aña 1996 a haci su prome apariencia den corte diaranson.
Duane “Keffe D” Davis di 60 aña di edad, a presenta den corte diaranson sinembargo e audiencia a ser corta despues cu el a pidi Hues Tierra Jones pa pospone e audiencia. Mopreme Shakur, e rapper su stief ruman no tabata den corte diaranson pero a conta The Associated Press cu e ta siguiendo e caso di cerca for di cas na Los angeles aunke su persona y su famia “a prepara nan expectativa caba.” El a agrega cu “Hobennan di color scur hopi biaha ta lidia cu husticia atrasa pa motibo cu hopi biaha nos ta ser mira como e criminalnan. Husticia a ser atrasa pa hopi tempo caba, apesar di tur e wowonan y atencion, apesar di e hecho cu mi ruman tabata un celebridad.”
Davis a keda aresta diabierna rond di su cas. Algun ora despues un hurado su acusacion formal a keda revela unda ta acusa su persona di asesinato. Davis a nenga un peticion di AP pa entrevista den e prizon unda e ta deteni sin posibilidad di libertad. E huradonan tambe a vota pa arega na su sentencia pa e uso di un arma mortal y supuesto actividad relaciona cu gang. Si declara Davis culpabel, esaki lo por agrega decadanan na su sentencia. Na Nevada, por acusa un persona di asesinato si e persona a asisti e sospechoso den comete e crimen.
Abogado basa na Los Angeles Edi Faal a conta AP via yamada di telefon despues di e audiencia cu e ta Davis su abogado personal ta yudando e haya un abogado na Nevada. “Mi a traha cune pa mas di dos decada,” Faal a comenta. “Pero actualmente mi no tin un comentario.”
