Hunto, Sony Music y Global Citizen lo lansa un version nobo di e cantica famoso, ‘Color Esperanza’, cu e artistanan musical principal di Latino America. E cantica lo ta disponibel riba tur plataforma principal di transmision – Spotify, Apple, YouTube, Deezer, Pandora y Amazon – cuminsando awe 18 di mei.
E version nobo ta bin den formato di un mini-episodio di 10 minuut, cu ta busca uni e region Latino Americana cu un mensahe di speransa pa celebra e trahadonan di prome linea di COVID-19. E prome episodio social lo inclui actuacion musical di e miho artistanan Latino y historianan di trahadonan di prome linea den e region. “E episodio lo hiba nos audiencia pa mira y scucha e cantica di Color Esperanza 2020 pa duna apoyo na esfuersonan di respuesta di COVID-19 na America Latino”, nan a anuncia.
Lo participa Diego Torres, Ruben Blades, Camila, Camilo, Pedro Capó, Coti, Dilsinho, El Cigala, Farruko, Fonseca, Kany García, Leonel García, Gente De Zona, Leslie Grace, Nicky Jam, Lali, Ara Malikian, Dani Martín, Mau y Ricky, Prince Royce, Rauw Alejandro, Reik, Río Roma, Carlos Rivera, Ivete Sangalo, Thalía, Angela Torres, Manuel Turizo, Jorge Villamizar (Bacilos) y Carlos Vives.
“Global Citizen y Sony Music ta comprometi na apoya esfuersonan contra COVID-19, trahando cu organisacionnan regional y local den henter mundo cu ta intensificando y cambiando nan esfuersonan pa aborda e desafionan particular presenta pa COVID-19”, nan a sigura.
Tur ingreso neto genera pa e cas discografico cu e cantica aki lo ta destina pa Organisacion Panamericano di Salud (OPS) pa yuda stop transmision di e virus y mitiga impactonan di COVID-19 riba salud di e region. OPS ta e agencia di salud internacional specialisa pa America. E ta traha cu paisnan den henter e region pa mehora y protege salud di hendenan. E obhetivo di Global Citizen ta pa crea consciencia tocante e iniciativa aki, invita mundo pa join e movemento y haci un diferencia simplemente scuchando ‘Color Esperanza’.
