Sondeo na Aruba encarga pa accion 21 nomina na e prestigioso premionan reed latino

Fraccion Accion21 a conduci un sondeo e aña aki, haci por medio di tercer partidonan, cu e obhetivo di conoce y compronde opinion publico. E partido ta uza estudionan cientifico cu un margen di eror di 2,5% pa determina kico pueblo di Aruba ta pensa ariba topiconan economico, politico y social. Tanto na 2021 y 2022 Accion21 a encarga un compania respeta na Latino America pa haci sondeo caminda ta percura pa haña contesta di tur bario, edad, genero, nivel di enseñansa, etc. den margen di distribucion nacional segun ultimo censo pa compronde opinion publico miho.

Nos pueblo su perspectiva riba diferente materia importante y unda nan ta mira problemanan ta e base cu e partido ta uza pa desaroya su plan di partido, ponencianan y solucionnan. E sondeonan a wordo haci a base di resultadonan di participacion anonimo.

E Premionan REED Latino ta e premionan mas importante di e industria di comunicacion y mercadeo politico na Latino America. E ta wordo organisa pa e revista “Campaigns & Elections” na Spaño. Trabaonan di Latino America y Caribe incluyendo Brasil, mercadonan Hispano na Merca y di Spaña por ser someti pa wordo considera pa nominacion. Campañanan electoral, publicacionnan, tesis di comunicacion politico y mercadeo publico y gubernamental cu a tuma lugar durante e periodo entre 10 di juli 2021 te cu 13 di augustus 2022 por keda nomina.

E aña aki e premionan lo wordo otorga na Panama, unda cu e Encuesta Digital y Nanotargeting encarga pa Accion21 y conduci na Aruba a wordo nomina den e categoria di “Mejor trabajo de investigación socio demoscópico a través de nuevas tecnologías”. E ganadornan lo wordo anuncia durante celebracion REED Latino Awards 2022 dia 11 y 12 di november na Hotel La Compañia Panama.

“E ta un honor cu nos sondeo a wordo nomina pa e premionan aki. Nos a deposita nos confiansa den un compañia profesional pa conduci e investigacion cu a yudanos compronde e percepcion di pueblo di Aruba den diferente aspecto, mediante procesonan cientifico cu ta respalda e validez y resultadonan di e sondeo. Nos ta hopi

orguyoso cu algo innovativo sosodiendo den politica na Aruba ta haya reconocimento internacional. Accion21 ta extende un pabien na nos colaboradonan y nos ta deseanan hopi exito ariba e anochi final.” Parlamentario y Lider di Partido Accion21, Miguel Mansur a declara.