Recientemente Inspeccion di Salud Aruba (IVA) a presenta e resultadonan di e rapport di e prome sondeo di siguridad di remedi na HAVA (asociacion di dokternan di cas) y VAA (asociacion di boticarionan).
E sondeo aki a tuma luga di januari pa april 2017, y tabatin como meta pa haya un bista amplio di e proceso di prescripcion y entregamento di remedi na pashentnan. A enfatisa riba con cuidadoso esaki ta tuma luga. IVA a bishita 14 dokter di cas y 4 botica durante e periodo aki y tabatin varios encuentro cu dokter di cas cu no tabata inclui den e 14 dokternan di cas, cu e meta pa haya un bista mas representativo di dokternan di cas na Aruba.
A base di informacion colecta, Inspeccion di Salud a duna recomendacionnan pa minimalisa problemanan di siguridad di remedi, pa evita entre otro duna pashent remedi robes of dosis robes. A base di e recomendacionnan lo traha un plan di ehecucion pa inspeccion por monitor e progreso.
E topico di siguridad di remedi ta un di e seis topiconan clave cu IVA lo enfoca riba dje den e añanan venidero. E topico aki a haya prioridad pa motibo cu e ta un topico cu ta di importancia pa e diferente dunadonan di cuido den e prome liña di cuido (p.e. dokter di cas, botica) y esunnan den e di dos liña di cuido (p.e. specialista). Den e simannan cu ta bin, IVA lo duna informacion mas amplio di e resultadonan di e sondeo y tambe recomendacionnan duna na e diferente partnernan.
