Un lesador di e a articulo di siman pasa por pensa lo siguiente: Simon e ideanan ta zona hopi atractivo, pero esnan cu menos recurso casi no por sobrevivi na e momento aki, lubida di tin placa pa instala panel solar of bin cu sistema di bateria y microgrids. Tambe semper bo ta indica cu Aruba tin problemanan financiero grave y cu esakinan tambe ta presente riba nivel global economico. Pues bo vision lo gewoon keda un fantasia bunita.
Den e articulo aki nos lo mustra cu tin hopi opcionnan pa finanzas e vision proponi den e prome publicacion di e serie aki. Nos lo toca e tema interesante yama “Green Finance”.
Na nivel global tin hopi likides
Segun e data mas recien di US Federal Reserve Bank of St. Louis su database publico tin mas cu $5.9 TRIYON US Dollar den fondonan “Money Market Funds”.
Esaki simplemente ta fondonan di likides riba nivel global cu por wordo mobilisa si oportunidadnan financiero lo materialisa.
Un area hopi atractivo y creciendo rapidamente ta esun di “Green Finance”. Segun e rapport grandi “The Global 50”, di Dubai Future Foundation, e mercado di bonds global pa proyectonan cu ta yuda baha CO2, ya caba ta $2.4 triyon dollar den tamaño. Anualmente $1.3 triyon ta wordo inverti den e area aki y segun e rapport di Global 50, e inversion anual lo por crece cu 300% den e añanan binidero.
E punto cu mi kier duna cu e datonan aki ta cu riba un nivel global tin mas cu suficiente likides disponibel cu segun mandatonan nobo di fondonan grandi mester wordo inverti den proyectonan “Green”. Ora nos wak e cifranan menciona pa financia Aruba su transicion pa Solar&Battery&MicroGrids lo ta ni un druppel den e ocean di likides cu por wordo mobilisa.
E return on investment pa energia solar ta presente
Pa un parti di capital internacional ta interesa den proyecto di energia solar na Aruba mester tin kico ta wordo yama “Return on Investment”, esta e inversionista mester por haya ganashi riba su inversion.
Usando data di un empresa di solar grandi na Aruba a haci un calculacion cu pa November 2023, e Return on Investment di un 10KW system ta riba 26% pa aña. Esaki ya caba, no tumando na cuenta cu proyectonan grandi manera proponi den mi articulo anterior lo ta na nivel “bulk”/comercial cu ta mas atractivo ainda. Tambe cu prijs di panel solar ta na un nivel di record atractivo cu ainda no ta wak na Aruba pasobra esaki ta costa un par di luna pa bira visibel door di cadena di suministro
Tur esaki ta pone mi conclui cu e ROI siguramente t’ey y cu facilmente por ofrece un fondo grandi 6% pa aña y toch keda cu mas cu suficiente savings pa e usuario, cual ta pueblo di Aruba.
“Vereniging di Habitante” hunto cu banconan comercial por yega na capital internacional
Den nos prome articulo nos a papia di gruponan di ongeveer 50 cas. Un di e diferente terminonan usa pa un grupo asina ta “Vereniging van Huis Eigenaren”. Door cu ta un grupo di mas grandi di hende e tarifa di interes cu lo wordo ofrece lo ta mas atractivo.
Pa un proyecto di tamaño nacional manera mi persona ta propone, e banconan comercial via nan netwerknan internacional financiero por conhuntamente crea un “Green Bond Solar” pa Aruba of tuma contacto cu e diferente “Sovereign Wealth Funds” of Pensioen Fonds nan grandi cu tin den nan mandato pa inverti di Green Technologies.
Asina por den mi opinion facilmente yega na e financiamento di un Aruba 100% renobable y baha prijs di coriente pa habitantenan den forma radical.
