Serlimar a duna un splicacion tocante e desaroyo cu ta tumando luga banda di area di Parkietenbos y Sero Tijshi. Den area hende ta kehando di un mal holo y nan a splica cua ta e solucion pa cu e situacion aki.

Director Henley Davelaar di Serlimar a splica tocante e problema cu tin di holo y con ta atendiendo esey. Dialuna cu a pasa a reuni cu compania di experto pa haci un evaluacion. Nan a sinta cu nan den oficina pa duna un historia di e situacion.

Despues a bay na e luga mes. Tambe a bay na e compania cu ta haci separacion di desperdicio prome cu nan yega na e fase unda cu ta actualmente.

Nan a manda un serie di pregunta adicional, unda cu nan tin e contesta caba, banda di esey e compania a traha un rapport pa locual nan a haya na e sitio. Di eynan nan a saca un solucion di plaso corto, medio y largo.

Den plaso corto lo bay tin midimento di area, nan lo wak cuanto cantidad di gas tin, ki tipo di gas, e temperatura cu tin pa por haci e trabou necesario pa remedia pa tempo largo. “Locual nos ta bay haci ta contene e holo.”

Nan lo uza e metodo riba area di calichi pa asina wordo compacta y evita pa e gas por pasa. Sinembargo e material ta laga espacio pa sigui pasa pero cu menos chens. Cu esaki nan lo bin cu e solucion pa tempo largo.

Tin otro area rond cu tambe a sigui cu e proyecto aki pero no tin mesun keho, Davelaar ta contesta cu sushi cu a wordo dera den e sistema ey despues di 1 pa 10 aña e ta fermenta, pero cu plan a falta e manera exacto di conocemento of recurso, anto pa e motibo aki a involucra e compania di experto pa bin cu solucion mas duradero.

Davelaar a bisa cu esey ta e forma inicial cu por comparti. “Mi mester bisa si cu a cuminsa na 2018 cu e proyecto pa e region aki. Aruba ta prome caminda nos a haci’e. Sushi riba sero ta keda un problema, pero esey ta e solucion temporal y mas structura cu tabatin pa Parkietenbos.”

E ta agrega si cu no ta manera perfecto, pero e ta e miho manera pa controla. E ta agrega cu tur hende ta di acuerdo pasobra nan no kier mas problema pa e saneamento di Parkietenbos. Pa e motibo aki cu experticio di ingeniero experto lo bin cu solucion pa alivia e desaroyo aki di holo y huma.

Pa awo tin cu warda e rapport di experto pa asina sigui cu e proceso pa evita gas sali y haci daño na medio ambiente. Lo prepara pa yuda e parti tecnico pa procesa e gas cu tin abou y pa laga e compania pa tin e solucion: ‘Ta trahando pero, lo dura tiki mas largo’.