– Servicio di Impuesto di Aruba (SIA) ta na altura cu no tur hende a ricibi ainda nan formulario di declaracion di impuesto. Pero di otro banda e termino legal pa entrega e formulario aki a wordo prolonga.
Den combersacion cu Bon Dia Aruba, PR di SIA, Sra. Meverly Romano a declara den algun caso e formulario no a wordo imprimi y manda pa e persona. Pero tambe tin caso cu e formulario a wordo manda y pa un of otro motibo e persona no a ricibi e formulario. Pa tal motibo na luna pasa nan a bin cu un comunicado pa solicita e hendenan cu no a ricibi e formulario pa nan pasa busca un duplicado na SIA su sede principal na Camacuri pa asina nan por cumpli cu e yenamento di e declaracion aki.
Normalmente nan ta imprimi alrededor di 39 mil declaracion di impuesto y tur aña e cantidad aki ta crece mas di loke e por baha. Tin persona cu ta cay afo ya sea pa motibo di fayecimento of tambe e hendenan den transcurso di aña nan ta haya solamente un pensioen di behes, y SIA ta saca nan for di nan sistema.
E clientenan nobo ta esun cu ta pidi pa wordo registra specialmente ora cu nan tin gasto como hipoteca cu mester paga interes pa haci haya un reduccion. Unabes cu nan ta presenta nan prome declaracion y cu ta keda registra caba, nan ta keda ricibi un formulario tur aña.
Prolongacion
E ultimo dia conforme e termino legal pa entrega e formulario di declaracion di impuesto ta dia 1 di december. Sr. Romano a informa cu e aña aki nan tin un maneho diferente pasobra tur aña nan ta haya mas cu 10 mil peticion di clientenan cu ta pidi pa prolongacion di e termino.
Pa eficiencia y pa por cumpli cu e cliente ya cu e peticion di prolongacion ta asina halto, gerencia di SIA a dicidi di extende e termino cu seis (6) luna mas di entrega di e formulario aki. E prolongacion automatico aki ta pa esunnan cu no ta alcansa pa entrega su declaracion prome cu 1 di december. Esunnan cu no alcansa e deadline di 1 di december lo haya un carta di SIA, caminda nan ta wordo informa cu nan ta haya un prolongacion automatico di 6 luna mas di tempo. Pues te dia 1 di juni 2017 ta bira e delaster fecha pa e cliente di SIA por completa su informacion y entrega e formulario na e departamento di gobierno aki.
E clientenan di SIA mester ta consciente di e cambio aki, ya cu contrario na e añanan anterior, e clientenan tabatin obligacion di entrega un peticion pa prolongacion. Pero e aña aki, e obligacion aki no ta e caso mas, ya cu no ta necesario cu e cliente ni su consehero di impuesto, entrega un carta di peticion pa pidi pa prolongacion di termino, segun PR di SIA Sra. Romano.
