Recientemente a wordo realisa tres referendum pa tres NV cu tin di haci cu e mesun compania, Eagle Aruba resort & casino. Pero na final, sindicato FTA a denuncia publicamente cu tabatin cierto tipo di intimidacion contra e trahadonan.
Sindicato FTA a pidi e referendumnan aki cerca Mediador di Gobierno pa representa e trahadonan di e hotel menciona. Pero nan ta haya cu tabatin intimidacion cu por a afecta cu e trahadonan por a haci uzo di su derecho constitucional pa busca representacion sindical. FTA ta kere cu esaki a wordo refleha den e resultadonan di e tres referendumnan aki.
Di e tres referendumnan, FTA a gana esun di e trahadonan di casino. Pero e sindicato a manda obhecion pa esun di trahadonan administrativo of accounting, y tambe un carta pa esun general na Mediador di Gobierno. Asina presidente di FTA, Hubert Dirksz a declara na e matutino aki.
E sindicato a laga sa cu malcontento riba e ‘manera cu e trahadonan a wordo stroba asina fuerte’. Sindicalista Dirksz a bisa cu nan tin prueba pa demostra esey.
Tin posibilidad y nan ta spera cu Mediador tene cuenta cu nan solicitud pa yama referendum di nobo.
