Fundacion Dominicano Juan Pablo Duarte ta wak cu e solicitud di ayudo pa cuminda cu ta drenta cerca nan, ta sigui aumenta keto bay.
“Cada dia e cantidad di solicitud ta sigui aumenta,” asina presidente di e fundacion aki, Winson Tavarez a declara na Bon Dia Aruba. E fundacion aki hunto cu Fundacion Pa Nos Comunidad ta organisando otro accion di entrega di pakete cu productonan basico, ya cu tin hopi hende den necesidad.
“Nos mester di mas ayudo pa nos por atende tur solicitud cu ta drenta cerca nos.” E pakete di alimento aki por dura maximo un siman pa un famia di tres miembro. Pero e tipo di ayudo aki ta temporal. Tavarez ta defini loke nan ta entrega como un tipo di ayudo temporal di ‘primer auxilio’. Si e famia mester mas ayudo, nan mester registra na Fundacion Pa Nos Comunidad pa asina nan por sigui ricibi ayudo di cuminda den un forma mas structural.
Na inicio di april e fundacion aki a cuminsa cu e accion boluntario di reparticion di ayudo di alimento. Te na e momento aki, nan so a yega di entrega alrededor di 400 pakete di ayudo. E siman aki nan kier sigui entrega mas ayudo pa medio di Fundacion Pa Nos Comunidad, conhuntamente cu New China Club y Asociacion di Comerciante Chino. Tambe algun miembro di e fundacion y miembronan di comunidad a yega di haci nan donacion di alimento.
Nan tin dos number di cel disponibel pa esunnan cu kier solicita e tipo di ayudo aki: 562-3093/592-1679. Nan por manda nan mensahe via WhatsApp. Tavarez a bisa cu ya varios solicitud a drenta caba. Nan ta haci un solicitud pa nos comerciantenan cu lo desea di duna nan contribucion na e noble causa aki.
