Un soldaat a mata 20 persona y a herida hopi mas den tiramento na Nakhon Ratchasima. Agente policial Jakraphanth Thomma a mata su comandante prome cu horta arma di un campamento militar.
E sospechoso a core ta na centro ciudad y drenta un compleho comercial unda a kere ta scondi. E motibonan di e sospechoso no ta cla, y e mes a publica potret di e atake riba rednan social.
Autoridad a cera e centro comercial di terminal 21 na Nakhon Ratchasima, tambe conoci como Korat, tanten cu nan purba localisa e sospechoso. Tropa y polis a ingresa edificio y tin informe di mas tiro.
Vocero di ministerio di Defensa, teniente general Kongcheep Tantravanich a bisa cu centenares di persona a sali di e compleho di un manera sigur pero, cu por tin mas persona den edificio.
Bangkok Post a informa cu e sospechoso, kende tin 32 aña di edad, a tuma varios rehen pero no ta confirma oficialmente. E mama di sospechoso a bay e centro comercial pa asina purba convence e persona pa entrega su mes.
Un persona libera a bisa BBC cu e conhuntamente cu otro tabata sconde den un baño, prome cu huy pa di dos piso y sconde bou mesa di restaurant durante 3 ora. Nan a tende 4 tiramento prome cu nan a mira soldaat.
Gen Kongcheep a confirma cu 20 persona a muri. E sospechoso a tuma arma y municion di campo prome cu a tuma un auto estilo Humvee. El a cuminsa tira cu arma di candela den e centro comercial Terminal 21. Por wak via rednan social local cu e sospechoso a sali di e auto y a cuminsa tira hende cu tabata huy.
Prome minister Prayuth Chan-ocha ta sigui acontecimento y a expresa su condolencia na famia di e fayecidonan. Minister di salud publico a haci un yamado pa persona haci donacion di sanger na hospital di e zona.
E sospechoso a publica riba Facebook puntrando si e mester a rindi, el a publica potret di un arma conhuntamente cu palabra ‘ta e ora di emocion’ y ‘niun hende por evita morto’.
