“Mi a wordo usa y mi a wordo gaña, nan tur a campaña cu e mesun protocol pero awe nan ta haci cu e protocol ey no ta existi.” Awe den oranan di mainta medionan di comunicacion a wordo convoca pa un conferencia di prensa di Solangel Dinmohamed-Lacle ken a trece dilanti su situacion politico den partido MAS y a aclaria cierto preguntanan.

Despues di eleccion dia 25 di juni, ora e votonan individual di candidatonan riba diferente lista a bira conoci esaki a trece diferente discusionnan den partidonan politico na unda partido MAS cu tabatin un acuerdo firma tambe a sali den luz publico cu un incidente entre dos candidato.

Solangel Dinmohamed-Lacle cu tabata candidato number 4 riba lista di partido MAS a dicidi di keda keto pa cu e caso aki pero awe pa despues di casi un luna, el a kibra e silencio y trece dilanti e banda di su medaya “den cuadro di transparencia y integridad” cu ta nifica hopi pa su persona como ser humano y como un politico, manera e mes a menciona.

Dinmohamed-Lacle a señala cu dia 6 di mei candidatonan a firma un protocol denomina ‘Protocol den Democracia Parlamentario’ na unda tabata indica cu e candidato cu mas voto tabata esun prome yama cu lo drenta Parlamento di Aruba.

E protocol aki a ser presenta na comunidad door di tur miembro di partido incluyendo e lider di partido MAS Marisol Lopez-Tromp, el a bisa cu dia 6 di mei nan a sinta den un reunion di partido na unda e lider di partido a propone pa nan firma e protocol aki na unda tur candidato a firma cu excepcion di candidato number 6 (Michel Mungra) cu no tabata presente den e reunion y cu no tabata un candidato oficial riba e lista, segun Dinmohamed-Lacle a declara.

“Na e momento aki a duna number pa cada candidato y a bisa cu number lo no ta importante, pasobra nos lo bay na base di e protocol, nos tur a firma e protocol aki y nos tur a bay di acuerdo pa cumpli y honra e protocol aki”, el a comenta.

Di mesun manera, el a trece dilanti cu nan tabata na haltura cu ta existi un kiesverordening y cu esey ta riba e protocol pero nan tambe tabata consciente cu nan tabata tratando cu “personanan adulto cu a yama nan mes integro, sincero y confiabel” cu nan tabata firmando un documento cu un lider di partido cu tin 23 aña di experiencia politico.

Dinmohamed-Lacle a enfatisa cu e ta consciente cu e no a saca su mes pero el a aclaria cu el a saca mas voto cu candidato number 2 (Aquannette Gunn) y candidato number 3 (Bartholomeus Koster), e tambe a papia cu kiesverordening den su articulo number 92 cu sin su 189 voto partido MAS no lo a haya e di dos restzetel, loke ta nifica cu nan por a haya un stoel so den parlamento, pero sinembargo nan a dicidi pa no honra e protocol aki, manera el a afirma.

For di dia 6 di juni te cu dia 25 di juni dia di eleccion, Dinmohamed-Lacle a bisa cu tur candidato a usa esaki como un herment di campaña na unda cu diferente documentonan cu el a presenta den conferencia di prensa el a sustenta loke el a trece dilanti.

Despues cu resultadonan a sali, Dinmohamed-Lacle a bisa cu el a purba di haya contacto cu lider di partido MAS “22 biaha mi a yama señora Lopez Tromp sin ricibi ni un solo yamada back, despues di tres dia mi a pidi un reunion cu caracter urgente pa e por duna un aclaracion di loke ta pasando riba e protocol cu nos tur a firma, na unda cu mi a haya un mensahe di Sra Tromp e cual ta bisa cu e ta hopi ocupa cu asuntonan politico y tur cos lo cana a base di kierverordening”, Dinmohamed-Lacle a señala.

Na e momento aki, tambe el a indica cu el a tuma contacto cu Aquannette Gunn na unda cu el a bisel’e cu e tambe lo sigui e kiesverordening y “cu mi lo haci lo cual lider di partido bisa mi pa haci” loke Dinmohamed-Lacle a declara cu esaki tabata un hanchi di awa friu p’e.

“Mi a wordo usa pa señora Lopez Tromp y mi a wordo gaña pa Aquannette Gunn, nan tur a campaña cu e mesun protocol pero awe nan ta haci cu e protocol ey no ta existi”, el a sigura.

Tocante e video cu Gunn a publica riba su rednan social, Dinmohamed-Lacle a expresa cu el difama su persona y cu a wordo usa pa no cumpli cu e protocol, “e video aki ta e video cu a causa cu awe partido MAS no ta forma parti di gobierno”, den e video tambe a menciona cu Dinmohamed-Lacle tabata practica ‘Canibalismo’ na unda cu el a informa medionan di comunicacion presenta cu durante campaña el a bishita 624 cas di e cual 1 di nan a pidi e presencia di Gunn.

E motibo di pakico Dinmohamed-Lacle no a reacciona dianan anterior, segun el a manifesta no tabata pa miedo of cu Gunn tabatin rason, e motibo cu el a scoge segun e mes a sigura ta pa prudencia pasobra el a laga Lopez Tromp asumi su rol di lider, na unda el a tuma contacto cune y a manda un carta na directiva y cada candidato di partido MAS pidiendo aclaracion riba e protocol y pidiendo Gunn pa rectifica pero esey no a sucede.

Di mesun forma, segun el a afirma Lopez Tromp a usa mesun modus operandi cu miembronan di gobierno anterior a haci cune ora e tabata minister cu a wordo retira for di su funcion “mi ta kere akinan nos por haya un bon imagen di ken en realidad Marisol Lopez Tromp ta y nan a forma un complot pa purba tacha mi”.

Dinmohamed-Lacle a menciona tambe cu lider di partido Lopez Tromp a menasa su persona na unda el a bisa cu e ta haci Lopez Tromp responsabel di su integridad fisico y di su famia, pa finalisa el a afirma cu e no a retira for di partido y cu el a haya un carta for di directiva na unda a señala cu e no ta miembro di dje mas y cu lo tuma pasonan legal pa loke ta trata e video na unda el a wordo difama.