Pa loke ta e situacion cu hospital ta indica di e cantidad excesivo di hende cu ta bay Spoed Eisende Hulp (SEH) y con nan ta haci intento na conscientisa e hendenan di e rol di SEH. AZV di su banda desde februari a haci un encuesta bou di tur e dokternan di cas, cu meta pa haya informacion di locual cu por mehora.
E encuesta a wordo haci hunto di Departamento di Salud Publico (DESPA), unda cu a saca team di Despa y di AZV pa controla/observa tur e oficinanan di dokter di cas. AZV tambe tabata haya señalnan cu aparentemente tin cosnan cu no tabata bayendo bon na oficinanan di dokternan di cas.
“Mi mester menciona si cu ta señalnan mas den e ramo organisatorio of logistico. Y a base di esey, hunto cu Despa a haci un prome investigacion/ estudio bou di cual e pashentnan a forma parti di dje.” Actualmente ta wardando resultado definitivo di esaki pa despues por comparti e informacion aki cu publico y loke cu AZV tin como meta ta, pa haya sa cua ta e puntonan di mehoracion segun e pashentnan mes. “A drenta e oficinanan di dokternan di cas y e pashentnan cu tabata e momento ey presente a duna nan un lista di pregunta cu nan por a contesta y keda anonimo y vocifera su opinion. Segun Sra. Tchong ta splica e preguntanan tabata riba e parti logistico/organisatorio por ehempel: Ki forma ta prefera pa traha cita cu dokter di cas, reglanan pa esaki si por yama of no por yama, e parti higiena etc. tambe a wordo observa. E contestanan aki lo duna un bista si tin puntonan similar cu hospital/SEH tambe ta señalando. “Por ehempel, actualmente ta bisando cu pashentnan no por yega facil na nan dokternan di cas of cu nan ta enfrenta cu den dia nan no por haya cita, e ora obligatoriamente nan ta bay e dokter di cas na warda of nan ta bay SEH. E data cu haya ta spera cu ta duna un bista pa wak e puntonan cu mester wordo mehora hunto cu e dokternan di cas.” AZV ta wak e parti positivo y kico tur por haci pa yuda e situacion y yuda cu e pashentnan por yega na nan dokter di cas.
Cantidad pashent y dokter
Segun Sra. Tchong, segun palabracionnan entre AZV y e asociacion di dokternan di cas, nan mag di tin un maximo di 2475 pashent. Sinembargo esaki ta varia den e sentido cu tin periodo cu baby nan ta nace cu ta cay bou di e grupo cu por inscribi direct. “Baby semper por bay di biaha na e dokter di su mama of su tata.” E cifra ariba menciona no ta uno cu tin na bista tur dia, pero ta wak con esaki ta bay.
Den cuadro di esaki tabatin 4 practica cu aña pasa AZV a haya su mes obliga pa manda carta na e clientenan pa avisa cu lo bay haci algun traspaso, como ta encera practicanan cu ta demasiado grandi pa por baha e cantidad pa e no bay a costo di servicio y pa hendenan por wordo traspasa pa un dokter di cas nobo. Asina tin diferente manera cu a haci pa percura cu e servicio sinembargo ta keda optimal.
Tambe a puntra Sra. Tchong si tin suficiente dokter di cas na Aruba. Opinion di AZV actualmente ta cu no tin suficiente dokter di cas, y cu lo kier pone algun mas. Ta enfrentando algun reto cual un di nan ta cu e cantidad di dokter di cas pasobra tin algun cu dentro di poco lo ta yegando e edad di pensioen (65 aña). Door cu AZV su contract ta bisa cu ora cu yega edad di 65 aña e contract ta termina, ta haya cu e aña aki lo mester bin cu un of dos dokter cu lo mester wordo reemplasa. “Mester wak e situacion si, pero si tin necesidad pa prolonga contract di un dokter pasobra e situacion ta precario, ta haci esaki. Pero generalmente ta purba di cuminsa pone e reemplaso nan tambe, pasobra e contract nan ta mara na 6/5 aña.
Pa loke ta ora cu dokternan di cas mester atende pashent, Sra. Tchong ta splica cu den nan contract tin e cantidad di ora stipula yama “Pashent contact uren”. Tin esey palabra cu nan. E oranan ta wordo organisa door di nan mes, pero ta mas o menos 32 ora pa siman cu nan mester consulta cu pashent. Banda si esey Sra. Tchong a sigui splica cu nan tin un cierto cantidad di ora cu nan mag di tin liber pa dedica na administracion of otro tipo di trabounan. Banda di esaki tin otro cosnan cu no ta regla manera e orarionan fuera di ora di oficina. Un pashent mester por sa ta ki ora e por localisa su dokter di cas, ki ora no y na unda e mester ta pa haci esaki cual ta partinan cu AZV ta kere cu tin espacio pa mehora.
Terminando Sra. Tchong a bisa cu e ta consciente cu tin hopi dokternan di cas cu ta traha bon, pero tambe tin cu por mehora pa asina drecha locual ta e criticanan cu tin di pashentnan y e retonan cu SEH ta enfrenta cual nan ta haya cu no ta na nan luga. AZV kier yega na un sistema uniforme con dokternan di cas ta duna servicio, un orario uniforme por ehempel cu ta pone disponibel pa pashentnan yama, cual no ta e caso actualmente. Esaki lo facilita e asegurado di AZV cual ta pashent, pa e compronde kico e mester haci si e kier acudi na su dokter di cas.
