(Sciencealert)—Solamente cinco minuut di ehercicio pa dia bo ta suficiente pa baha presion di sanger, manera un estudio a descubri. A calcula cu un par minuut di actividad cu ta hisa bo grado di curason, manera ciclismo of subiendo trapi, ta baha e presion di sanger sistolico pa 0.68 mmHG y presion di sanger diastolico pa 0.54 mmHG, manera e data a mustra.

Conoci tambe como hipertension, e condicion ta carga un riesgo aumenta di problemanan di salud, incluyendo ataca di curason y daño den riñon. “Loke ta unico di nos variable di ehercicio ta cu esaki ta inclui tur actividad parecido ehercicio, for di subimento di trapi pa coremento di bais, hopi di cual por ser integra den rutinanan diario,” segun autor principal y epidemiologo Jo Blodgett for di University College London.

E estudio tabata basa riba un siman di data di actividad y evaluacion di presion colecta usando aparatonan riba 14,761 participante.

A parti actividad diario den seis tipo: drumimento, comportamento sedentario, canamento lento, canamento lihe, paramento, y ehercicio vigoroso. E patronchinan diario aki a ser compara despues cu presion di sanger, cu varios otro posible influencia (incluyendo edad y sexo) factora den e evaluacion. Despues e investigadornan a calcula algun scenario condicional—tocante bon e habitonan ey por cambia presion di sanger.

Como un estudio observacional envolviendo varios variable, no por saca un causa directo. Asina mes, mientras e equipo a analisa data for di un grupo grandi di hende, tin un indicacion fuerte cu solamente un cantidad chikito di ehercicio por afecta presion. Mirando e tiki tempo necesario, y e variedad di ehercicionan simple cu ta haci un diferencia, e equipo internacional tras di e investigacion ta spera cu e descubrimentonan aki por yuda e 1.28 biyon adulto globalmente cu hipertension.

“E descubrimento cu solamente cinco minuut di ehercicio pa dia por ta asocia cu cambionan den presion di sanger ta enfatisa con poderoso movemento intenso y corto por ta pa maneho di presion,” segun e otro autor Emmanuel Stamatakis, profesor di actividad fisico y salud di poblacion na University of Sydney.

E investigacion aki a ser publica den revista Circulation.