Diabierna ultimo Stichting Onroerend Goed Aruba (SOGA) a ofrece un conferencia di prensa pa asina informa comunidad tocante e proyecto di construccion di Hospital Dr. Horacio Oduber na unda el a splica con esaki ta bayendo y cu lo cuminsa traha den dje back den proximo siman.

Edwin Roos, vocero y tesorero di SOGA, primeramente a splica cu nan ta doño di diferente edificio cu Gobierno di Aruba ta uzando y den ocasion aki nan a elabora riba edificio di Hospital unda el a duna mas detaye di e proyeccion di construccion cu a bin causando controversia den ultimo dianan.

El a sigui splica cu den algun medio di comunicacion a sali informacion cu no ta cuadra cu berdad y cu nan relacion cu gobierno, hospital y e compania contratista ta bon: “circunstancianan a pone cu nos a yega na e situacion actual cu nos mester a dicidi di parti caminda prome cu bay asina leu cu nos no por pasa den mesun porta hunto mas,” el a bisa.

Despues di tanto aña cu contratista OHL ta aki na Aruba nan tambe kier mira e proyecto aki finalisa, manera Roos a sigura. Ademas el a agrega cu nan no ta bay t’ey te na final mas pero nan ta keda disponibel te fin di e proyecto pa asistencia y consulta si tin mester.

SOGA no ta AIB Bank Aruba. Nan ta dos entidad diferente na unda John Hodgson conhuntamente cu Roos y otro dos persona ta conforma e directiva, cual nan ta asisti diariamente den e trabou door di personal di AIB.

“SOGA ta ofrece nos fondonan di pension oportunidad pa inverti cu un interes mas halto cu nan ta haya na banco y cu menos riesgo si nan ta inverti pafo cu ademas tin hopi recesion pa inverti como fondo di pension,” Roos a señala.

Nan ta inverti den fondonan den edificionan pa e bien general y hospital tambe ta cay bao di esaki: “e placa cu nos a paga pa tur e proyectonan aki no ta placa di gobierno, e ta placa di e letternan cu ta fondonan di pension, entre otro. Tin banco tambe cu a fia placa via nos pero principalmente ta fondonan di pension. E placa di e proyecto di hospital no ta bay pafo di Aruba tampoco; tur e contratistanan envolvi ta local. Trabaonan specialisa a wordo haci door di e contratista general OHL y gobierno ta paga back na SOGA e fiansa cu nos a haci pa hospital pa medio di huur. Asina ta alivia tambe e peso riba caha di pais Aruba door cu nan por paga back poco poco, nos mester paga proyecto delanta y despues purba hay’e back via belasting,” Roos a bisa.

Di e situacion actual, el a sigura cu e contratista OHL y SOGA hunto a dicidi di parti caminda cu den e proyecto cu a cuminsa na aña 2014. Nan a yega na un acuerdo hopi lihe y beneficioso pa ambos partido “aunke ambos banda ta lamenta cu el a yega asina leu y nan a dicidi di stop awor prome cu nos lo bira enemigo di otro.”

Cu hospital ta existi un bon relacion igualmente caminda el a sigura cu mas di 90% di proyecto di hospital ta cla y un gran parti di material cu tin mester ta na Aruba caba of ta na caminda. Den e situacion aki tabata e miho solucion pa SOGA pa dispidi di OHL cu nan acuerdo cu mester wordo finalisa ainda door di abogadonan, pero e sobra di trabou no specialisa cu nan no por haci cu nan mesun contratistanan cu ya caba a traha tur e añanan aki riba e proyecto.

Nan ta considera cu e motibo principal pa caba e relacion cu otro ta cu ta falta menos cu 10% pa caba cu e proyecto si nan ta mantene e contratista aki. Den nan opinion, e gastonan adicional di e costonan cu nan tin hende specialisa, no ta bale la pena compara cu e trabou completo total na balor di florin cu mester wordo paga ainda: “si nan keda e ultimo aña aki cu falta di trabou, den nos opinion, no tabata beneficioso, tabata un desacuerdo financiero.”

Den e proyecto di construccion aki cu a cuminsa na 2014 y mester a caba na 2018 a wordo traha un presupuesto y tambe a wordo haci un ‘meerwerk’ cu prijsnan separa: “p’esey tambe bo ta haya cu e fecha di entrega ta hala, pasobra ta bin mas trabou cu mester di mas tempo, dus esey ta loke a pasa na varios ocasion,” Roos a expresa.

Igualmente el a trece dilanti cu informacion cu ta bin for di añanan caba pa lo cual a wordo sigura cu den proyecto aki di hospital cu a lubida e sala di operacion. Roos a menciona cu no ta asina: “e proyecto aki ta basa riba un plan di exigencia cu a bin di hospital, cu hospital cu su experto a traha, e tempo ey ora a cuminsa traha e plan na 2010 of 2011 e sala di operacion cu nan tabatin nan tabata satisfecho cune y no a mester ta aden, ICU igual, cu no tabata necesario y nos a cuminsa cu e proyecto cu sin e dos componentenan ey.”

E proyecto a cuminsa asina, creando espacio nobo y ora nan a cuminsa renoba espacio existente eynan ta unda e complicacion a bini, por a planea, pero den un plan asina por mira cu tabatin extra trabou y extra tempo cu semper a bay den bon harmonia cu tur stakeholder SOGA, gobierno, hospital y contratista.

“Tur cuatro partido ta di acuerdo cu el a dura mucho, pero nos ta lubida cu tabatin un pandemia tambe cu nos no mag di traha mes y cada siman cu e contratista mester tabata na Aruba e ta cobra un suma substancial pa e ta presente y e no por traha pa via di pandemia,” Roos a expresa.

Nan no ta culpa e pandemia tampoco manera el a sigura, pero tabatin retraso pa diferente motibo: cu hospital tambe tabata operando, mester tene na cuenta cu empleadonan y tambe cu pashentnan mes, cu cualkier cambio cu mester a haci mester muda e pashent. Tambe nan a haya nan mes den situacion cu hospital ta bisa cu no por sigui traha pa motibo cu no por muda algun pashent ainda ni e departamento, esey a pasa na varios ocasion.

E tempo mas cu e proyecto a tuma no ta solamente retraso, e tambe ta extra trabou como e sala di operacion y ICU na unda esey a bin acerca.

E construccion ta wordo para pa un rato segun Roos a bisa, pero esey no ta nifica cu no tin progreso, prome nan mester finalisa na un manera bon cu OHL, nan mes ta zorg pa paga tur e contratista y mientras tanto nan por acerca e sub-contratista pa duna un prijs y finalisa e parti cu ta falta cu ta e salanan di operacion, cu tin un espacionan specialisa rond di e salanan cu ta e recovery cu tin rond y esey mester wordo traha aworaki na unda e sala di operacion bieu tabata ta.

E finalisacion mes di e proyecto por tuma luga den proximo siman, pero oficialmente nan mester yega na un acuerdo firma cu OHL di modo cu e contratista nobo por cuminsa traha pa SOGA pa motibo cu ainda nan ta contrata bao di OHL: “esey ta e tardansa, pero esey no kiermen cu nos no ta traha hunto pasobra e contratista aki pa orguyo profesional no di capricho. Ademas di stimacion pa Aruba nan kier finalisa e hospital, pero nan mester zorg pa bay den un manera bon. Tur ta willing pa traha cu nos”, el a finalisa.