Dianan pasa a sosode varios incidente den hospital cu a causa hopi conmocion den comunidad. Un di nan tabata inundacion den dos departamento pa via di un tubo cu a kibra y otro pa consecuencia di awasero cu diahuebs pasa a cay riba nos isla.

Tocante esaki, Stichting Onroerend Goed Aruba (SOGA) a tene un conferencia di prensa hunto cu directiva di AIB Bank, pa splica e situacion cu ta rondona e incidentenan di hospital, no solamente di siman pasa, sino di lunanan pasa tambe.

Den palabranan di John Hodgson, presidente di SOGA, primeramente nan a tende di un conferencia di prensa cu director di hospital, Ezzard Cillie y minister di Salubridad, Dangui Oduber a duna pa e medionan local siman pasa y di e manera aki, riba rednan social y den prensa a circula informacion tocante SOGA y proyecto di Expansion y Renobacion di Hospital cu no ta cuadra cu realidad.

Michael Habibe, director di proyecto di SOGA, a splica cu loke nan kier aclaria pa comunidad ta principalmente e incidente di awa cu a drenta den departamento di Eerste Hulp diabierna pasa. Tabata den oranan di marduga, ora un fitting di afvoer a los y despues cu nan a haci un investigacion riba esaki, a conclui cu e fitting a bula pa via cu e awasero no tabata sigui core desde e tubonan pafo cu na final mester hiba awa te Bubali plas, pasobra crecemento di yerba a blokia nan.

Riba esaki, Habibe a declara cu hospital ta responsabel pa mantene e area aki y ta cay bou responsabilidad di hospital mes y no di SOGA. Pa e awa por pasa door, tin cu limpia henter e sistema y saca sushedad cu tin aden, pues actonan di mantencion.

Frendsel Giel, director di AIB, a bisa cu nan tarea ta administra SOGA, pero na mesun momento, nan hunto cu SOGA a dicidi di sinta na mesa hunto cu stakeholders ora cu tin problemanan di comunicacion, manera den e caso aki. “Nos ta lamenta e sucedido y nos ta tuma accion inmediatamente pa soluciona e problema” Giel a manifesta.

Tambe a comenta cu mantencion ta importante, cada ekipo mester ta responsabel pa nan mantencion y den e caso aki, SOGA ta encarga su mes pa soluciona e problema pa loke ta mantencion.

“Nos ta trahando pa solucion, nos tin comunicacion cu gobierno, nos tin comunicacion cu hospital, nos como AIB tin cu señala e problemanan y percura pa pone problemanan riba agenda apropiadamente y nos ta bay pa termina e proyecto aki”, Giel a declara.

Importante ta pa menciona cu Giel a trece dilanti cu loke a pasa diabierna ultimo no lo trece un gasto adicional pa ni gobierno, ni hospital, ni pa pueblo. El a informa cu nan tin e liñanan di responsabilidad, nan tin e contratistanan, diseñado of seguro cu lo ta atende e parti aki. Tambe a agrega cu loke nan kier ta pa termina e construccion. Cada siman cu e construccion no sigui, esey ta trece un cifra pa e contratistanan cu si mester ta paga pa comunidad. Tambe a señala cu construccion of renobacion di un hospital mientras e ta operacional sin stroba operacion di hospital ta bin cu su retonan.

Tocante declaracion di minister di Salubridad, Dangui Oduber, Giel a bisa cu nan no kier reacciona riba esaki. Loke nan kier ta sinta cune pa discuti e problema.

Di loke ta trata e boiler cu a trece problemanan pa via di su ubicacion, nan a bisa cu esey no ta paden di hospital, e ta den un espacio cu ekiponan mecanico y ta forma parti di mantencion di hospital y su sistema di airco.

Pa finalisa, Hodgson a comenta cu nan tur ta habri papia, nan kier sinta na mesa y bin cu solucion cu hospital y gobierno tambe.

OHL/Orellano ta desmenti tur responsabilidad.
Den un rueda di prensa ayera tardi gerencia di OHL/Orellano, representa pa Jeffrey Shaheen, a splica en corto con nan ta mira e asunto di e incidente cu awa di diabierna pasa. El a declara cu su compania no tin nada di haci cu e asunto, pasobra ta falta di mantenemento a causa cu e awa di yobida no tabatin caminda di bay y esey a ocasiona e problema. Segun su declaracion, tabatin hasta mata ta crece den e sistema di deshaci di awa di yobida. El a declara ademas cu SOGA a duna un bon analisis di e situacion cu e ta apoya completamente y no ta bay contesta pregunta cu ta responsabilidad di otro pa contesta.

Contestando pregunta, Shaheen a bisa cu na varios oportunidad nan a yega di trece e problemanan cu nan ta mira dilanti, entre nan e asunto aki di falta di mantenemento di e sistema di awa di yobida.