Esaki ta e di seis biaha cu e politico, Marisol Lopez-Tromp, ta participa den eleccion. E biaha aki e ta e candidato number 3 riba lista di partido POR.

A pesar cu e ta un politico cu basta experiencia, e ta laga sa cu cada eleccion tin su particularidad, caracteristico propio y strategia singular di campaña.

Sra. Lopez Tromp ta corda cu tempo el a drenta politica, tabata prensa skirbi of corant como e medio mas accesibel pa divulga nan opinionnan y ideanan politico pa medio di comunicadonan di prensa. Sinembargo e tabata tarda por lo menos un dia prome cu e tabata sali publica.

Tambe antes e politiconan den campaña tabata propaganda via un pamfleta of via un emisora. Te hasta den parlamento e tempo aya no tabatin transmision live. Bo tabata depende grandemente di prensa, el a bisa.

Awendia e realidad ta otro, ya cu e relacion aki entre politiconan y prensa a cambia hopi mes. Danki na e facilidad tecnologico y digital, y haciendo uzo di internet, awor aki practicamente cada hende ta sinti su mes un hende di prensa, segun e.

Nan por publica bon y malo, y esaki tin su efecto hopi grandi y inmediato riba percepcion di e votado, e politico ta bisa. Esaki ta trece su exigencia tambe. E ta haya cu como politico nan mester ta mas rapido y mucho mas miho prepara pa enfrenta tur e retonan cu e panorama aki ta trece cu ne.

Campaña a base di conscientisacion
E biaha aki tin plataforma digital y instrumentonan tecnologico mas moderno cu ta facilita e acceso di biaha pa core campaña. Nan mensahe por yega di lihe y masivamente cerca e comunidad.

E biaha aki el a haci uzo entre otro di Facebook pa divulga su video cu mensahe di pedagogia democratico entre otro riba importancia di vota y rol di parlamento, etc..

“Mi meta ta no solamente pa haya hopi voto pa nos partido y mi persona. Pero tambe sigur pa conscientisa y educa nos comunidad.”

Sra. Lopez Tromp a drenta hopi jong den arena politico cu hopi expectativa y den tur e añanan cu a pasa, mas cu tin social media cu ta yega directamente cerca nos ciudadano, ta existi un necesidad di conscientisa y educa mas.

E ta haya cu ainda no tur hende ta full consciente di kico realmente ta un parlamento, y kico ta e diferencia cu un gobernacion. “Kico ta un bon parlamentario y kico no? Kico ta un bon gobernante y kico no? Con un presupuesto ta traha? Pa kico nos tin stempelparlament?”

Nan ta topiconan cu a base di su experiencia y conocemento, e ta kere cu ta sumamente importante pa aclaria nan. Pero e no ta pa e muchanan so pero pa e hendenan grandi tambe, pasobra tin hendenan ainda no sa pa ehempel kico ta e diferencia entre un gobierno y un parlamento. E ta bisa cu tin hendenan cu ta desconoci e rol cu cada un tin. P’esey e ta kere cu si cada un di nos por compronde e tipo di topico aki mas miho, sigur nos por vota mas consciente. “P’esey mes mi ta hiba e tipo di campaña di conscientisa.”

Social media
E echo cu e tabata parlamentario hopi aña y actualmente, pero ex minister tambe, y te hasta presidente di parlamento, el a haya un bista completo riba e diferente partidonan politico cu e sa di maneha den nos organo legislativo. Igualmente e por diferencia kico ta e parti debil y kico ta e parti fuerte.

“Mi ta sinti cu como parlamentario mi tin un rol pa conscientisa den esaki.” Ta asina cu e biaha aki el a dicidi di dedica un parti di su campaña electoral pa traha riba e tereno di conscientisacion politico y democratico.

E plataforma di social media manera Facebook ta brinda e posibilidad tambe cu como politico e por tin interaccion cu e hendenan cu kier trece cualkier tipo di comentario. Pero tambe e ta hiba e tipo di conferencia di prensa online y programa radial live, caminda e tin espacio pa pueblo por formula nan preguntanan y e ta contesta nan. E aspecto aki e ta haya importante, ya cu antes e posibilidad aki tabata limita.