Ayera 8 di september 2020 grupo #TaBasta a sinta hunto na mesa cu Sociaal Crisis Plan y Comision di Abuso Sexual di mucha.
Segun un comunicado di gobierno, durante e reunion a elabora riba puntonan cardinal cu Sociaal Crisis Plan ta actualmente trahando riba dje pa asina duna tur informacion riba e proyectonan andando. Lidernan di proyecto di SCP entre otro; Codigo di Proteccion, Centro pa Hoben y Famia y tambe Family Justice Center a duna un presentacion amplio na e miembronan di e grupo #TaBasta y a contesta diferente pregunta riba e area Hudicial y Social. Alabes Comision di Abuso Sexual di mucha tambe a elabora riba nan funcion y locual cu ta andando riba e tereno Hudicial.
Den un ambiente ameno y respetuoso tur dos banda a sa di duna nan puntonan di bista y preocupacion. E meta ta pa Sociaal Crisis Plan, Commission di Abuso Sexual di mucha y e grupo #TaBasta por sigui traha hunto riba cierto aspecto pa asina tur hende ta bon informa di tur e desaroyonan cu ta tumando luga riba tereno social, hudicial, enseñansa y salubridad den cuadro di Abuso di mucha y hoben aki na Aruba.
Sociaal Crisis Plan ta reconoce e importancia di e colaboracion entre e grupo aki paso ta traha pa yega na e mesun meta: pa caba cu abuso di mucha y hoben aki na aruba.
Den e siguiente dianan lo bolbe reuni cu e grupo #TaBasta pa asina elabora mas profundo ariba e 18 puntonan cu a wordo entrega oficial na Minister di Asunto Social y Minister di Husticia.
