Lider di fraccion di AVP den arlamento, Marlon Sneek, ta mustra cu ta di lamenta cu colega Dangui Oduber di fraccion di MEP, ta papia cu a ‘tranca’ su iniciativa di ley, pa loke ta e forma con representantenan di pueblo ta ser eligi den parlamento.
“Nos ta di lamenta cu representantenan di MEP ta papia cu a tranca e proceso pa loke ta tratamento di e ley aki den parlamento pero segun mi Parlamento tin tur autoridad pa haci pregunta y manda pidi documento si esakinan falta. Aki mi tin cu menciona mi iniciativa di ley pa loke ta cremacion ora cu mi a entrega esaki caminda e pidi mi pa un rapport di SER y mi a cumpli cu esaki.” A pidi mi pa un pensamento di minister riba e ley aki si esaki ta cuadra den e maneho di e minister y mi a cumpli cu esaki tambe, pues mi no ta mira cu por papia di tranca cos na ningun momento ya cu ta simplemente ta un asunto di pidi mas documento pa nos por tin mas informacion a momento cu nos ta bay cambia un ley. Den e iniciativa di ley aki ta un cambio di base, di cambia e structura den su totalidad y bo no ta hisa benta cambia e structura di un dia pa otro pero mester tin esaki bon documenta prome cu dicidi di cambia esaki.
Ta for di tempo cu nos tabata den Antias nos a pasa bin over como pais Aruba cu e ley aki y si nos mira e ley existente, ta duna posibilidad caba pa un persona cu ta bon prepara y ta popular y si e hiba un bon campaña e ta logra e meta aki. Aki nos por papia di entre otro Glenbert Croes kende tabata number 29 riba lista di MEP y a drenta parlamento cu voorkeurstem, tambe Marisol Lopez Tromp kende tabata number 29 riba lista di AVP pero kende tambe a drenta parlamento cu voorkeurstem, pues nos tin un base, nos tin un structura y awe ta papia di cambia e base aki.
Loke sigur ta di lamenta ta e hecho cu Dangui Oduber ta papia di tranca e proceso, pero aki ta bon pa mustra cu e iniciativa di ley pa cambio den e sistema di eleccion, a wordo presenta na parlamento, dia 28 di Maart di 2017, pues aki nos ta papia cu a tuma sr. Oduber 3 aña y seis luna cu e tabata como miembro di parlamento, pa e presenta un ley di e magnitud aki, y awor ta papia cu nan kier tranca su iniciativa. E proceso normal cu un iniciativa di ley tin cu cana, tur miembro di parlamento mester ta bon na altura di esaki, ya cu despues cu entrega esaki na presidente di parlamento, esaki lo wordo manda pa Raad van Advies cu lo tin su observacionnan pa cu e ley aki, ta sugeri cierto cambionan si ta necesario pa despues adapta esaki prome cu wordo presenta oficialmente na Parlamento.
Nos ta haya e impresion cu Dangui Oduber y su lider EvelynWever Croes, kier mira un cambio den e ley aki, pa atende cu asuntonan interno di partido MEP ya cu Aruba a conoce cuater Gobierno cu signatura di tata di Dangui, esta Nelson Oduber y nunca a mira un problema cu e sistema cu nos a conoce desde introduccion di Status Aparte.
Al contrario despues di eleccion di 2009, Nelson Oduber lider di MEP e tempo ey, a dicidi di hala un banda despues cu el a ricibi casi 6 mil voto y a permiti Xiomara Ruiz Maduro drenta parlamento kende a logra algo mas cu 200 voto,” lider di fraccion di AVP, Marlon Sneek ta mustra
