Snapchat lo stop di ‘promove’ presidente Donald Trump riba su servicio di mensahe di video, e ehempel mas recien di un plataforma di red social ahustando e forma con e ta trata e presidente Mericano aki.
Siman pasa, Twitter a pone advertencia di ‘fact-check’ riba dos tweet di Trump cu a yama votacion via post ‘fraudulento’ y a predeci problema cu eleccion na november. E compania a degrada y a pone un advertencia mas fuerte riba un di tres tweet tocante protestanan na Minneappolis, cu a bisa, en parti, ‘ora hortamento cuminsa, tiramento ta cuminsa’.
Accion di Snapchat ta mas limita. E ta nifica unicamente cu e post di e presidente no lo aparece den e seccion ‘Discover’ di e app mas, unda ta resalta noticia y post di celebridad y figura publico. Cuenta di Trump lo keda activo riba Snapchat y visibel na cualkier persona cu busk’e of siguie.
E decision, cual Snap – doño di Snapchat – a bisa a ser tuma durante weekend, ta pone e compania basa na Santa Monica den campo di Twitter, despues cu e compania ey a escala su accionnan contra Trump.
Facebook, mientras tanto, a permiti post identico pa keda, maske e compania y su CEO, Mark Zuckerberg ta enfrenta critica cada bes mas fuerte tocante e decision.
“Nos no lo amplifica voznan cu ta incita violencia racial y inhusticia door di duna nan promocion gratis na Discover”, Snap a bisa den un declaracion diaranson. “Violencia y inhusticia racial no tin luga den nos sociedad, y nos ta para hunto cu tur ken ta busca paz, amor, igualdad y husticia na Merca.
Snapchat tin 229 miyon usuario activo diariamente. Twitter, pa comparacion, tin 166 miyon. A diferencia di Twitter y hasta Facebook, Snapchat generalmente ta usa como un herment di comunicacion priva, cu amigonan mandando otro video cortico y imagen, y na un grado menor, siguiendo celebridad y otro cuentanan.
Den un tweet, manager di campaña di Trump, Brad Parscale a bisa cu CEO di Snap, Evan Spiegel ‘lo preferi promove e videonan di motin di iskierda extremo y curasha otronan pa destrui Merca na luga di comparti palabranan positivo di unidad, husticia, y ley y orden di nos Presidente’.
