Presidente di Conseho di Supervision, Sr. Bart Kool ta splica cu cambionan y planificacion cu tabata tin ultimo aña no sali na fabor di Colegio Arubano. Tin hopi punto fuerte y debilidad cual a wordo discuti den e dos dianan di reflexion cu docente y directiva a organisa e siman cu a pasa cu segun Sr. Kool ta bay cuminsa traha riba esakinan debidamente como tambe introduccion di rector nobo kende pronto ta bay wordo anuncia. Sr. Kool ta splica cu e proceso pa kies un rector nobo pa Colegio Arubano ta bay hopi mas leu cu nacionalidad y origen.
”For di luna di April 2016 a eigenlijk cuminsa cu e procedura pa haya un rector nobo cu e envolvimento di puntonan di interes di docentenan, Minister di Enseñansa, Departamento di Enseñansa y scol naturalmente.” Sr. Kool ta splica. Den un comision di seleccion cu ta consisti di miembro di Conseho di Supervision y directiva di scol como tambe miembro di docentenan, a yega na un profiel apropia segun Sr. Kool. Tabata tin hopi candidato di cual a wordo analisa y a sali un candidato hopi bon segun Sr. Kool anto ta hopi contento di a yega na un acuerdo cu e candidato kende lo bira rector nobo di Colegio. ”Tin algun punto pa discuti ainda y nos lo haci esey pero e procedura en general a bay hopi bon anto y e resultado tambe. ” Sr Kool ta bisa. A yega na un acuerdo awo cu ta duna Colegio un tiki mas trankilidad anto e intencion segun Sr. Kool ta pa traha cu e rector aki pa e siguiente cinco aña y locual nan ta haciendo awo ta un di e prome stapnan conhuntamente cu e rector nobo pa cuminsa trece resultado positivo pa Colegio.
Tabata tin 33 candidato, di cual entre nan tabata tin candidatonan di Aruba como tambe di otro nacionalidad. ”Nunca nacionalidad tabata un criterio pa evalua. Nos ta busca un persona di bon calidad cual ta hopi importante y nos a haya un candidato hopi bon cu ta di Hulanda.” Sr. Kool ta bisa. Un di e puntonan hopi clave den e negociacionnan cu e candidato tabata seguramente e salario cu e ta bay ricibi. ”Manera nos a priminti, nos no a yega na un salario cu ta bay sali mas loke eigenlijk esun cu ta subsidia ta permiti. Den enseñansa, e ta asina cu ta eigenlijk sigui loke e ambtenaarnan ta haya y den caso di enseñansa tin preocupacion den locual nan ta yama ‘functiehuis’. Den e ‘functiehuis’ nobo tin tur e salarionan cu ta wordo regla y nos ta sigui esey. Pues salario di rector mester cuadra cu locual esun cu ta subsidia ta bisa.” Sr. Kool ta comenta. Sr. Kool no por a ofrece cifranan oficial pero loke eigenlijk esun cu ta subsidia ta permiti ta alrededor di un 10,000 florin pa luna.
Programa pa entrena rector local
Segun Sr. Kool ta agrega, pa por tin un miho punto di salida den e cinco aña nan dilanti, eigenlijk nan kier investiga si ta posibel pa Colegio Arubano introduci un programa di entrenamento di maneho.”Candidatonan cu tin e interes y capacidad pa un dia bira parti di e directiva di e scol, nan lo por drenta un programa unda nos por entrena nan pa tin mas hende cu nos por duna turno pa drenta den directiva den futuro. Conhuntamente cu Universidad di Aruba nos a haci esaki y nan a haya esaki un bon idea anto asina nos kier tambe sigui cu e iniciativa cu Minister di Enseñansa a tuma tres aña pasa unda el a cuminsa un programa di ‘Colaborative Leadership’ na unda gerencia di scolnan por sigui un training pa prepara nan mes mas miho pa e trabao. Mi ta compronde cu e programa ta hopi exitoso y nos ta bay sigui cu esey anto expande un tiki tambe pasobra como rector bo tin tambe maneho integral, financiamento, personal y organisacion tur esaki nos kier pone den e programa.” Sr. Kool ta bisa. Esaki pues ta e intencion prome cu yega na tin un rector local segun Sr. Kool.
Ta analisando cuanto Conrector mester na Colegio Arubano
Algo cu Comision di Mayor mes a menciona recientemente ta e hecho cu por ehempel na Hulanda y Curaçao ta nombra 1 conrector pa cada 300 alumno anto Colegio Arubano tin sigur 1600 alumno. E ocupacion ideal segun Comision di Mayor ta pa tin entre 4 y 5 conrector. Comision di Mayor ta di opinion cu no tin suficiente conrector locual ta haci e scol mas zwak. Sr. Kool ta bisa cu esaki ta algo cu a wordo discuti den e dos dianan di reflexion anto den palabracion cu Minister di Enseñansa, nan ta wak cuanto Conrector eigenlijk tin mester na Colegio. ”E team e ultimo lunanan a traha realmente hopi duro mes y mi kier felicita y gradici nan pa nan esfuerso. Pa nos cuminsa na introduci cambionan, procesonan y proceduranan nobo na Colegio Arubano, kisas lo nos tin mester di un conrector mas. Pues un team di 1 rector cu 5 conrector. Nos tin cu evalua bon si e team ta suficiente grandi pa haci tur e trabaonan cu eigenlijk nos mes ta haci pa Colegio Arubano por bay dilanti.” Sr. Kool a bisa.
