SMFA ta firma acuerdo nobo di huur pa monumento ex-Botica Aruba

Durante un conferencia di prensa ayera na Steenweg 19, edificio di ex-Botica Aruba, a tuma luga firmamento di contract nobo entre Stichting Monumentenfonds (SMFA) y Cocolishi Studios, pa huur e parti ariba di e edificio pa un funcion nobo.

Mircla Nava, encarga cu PR, Marketing & Education, di SMFA a splica na principio di december ya caba e fundacion tabata presente na Steenweg 19 pa anuncia cu e edificio di ex-Botica Aruba, un monumento cu recientemente SMFA a restaura, lo conoce un funcion nobo cu ta e restaurant KOAL cu na principio di aña 2023 lo habri su portanan pa publico den e parti abou di e edificio.

Ayera mainta den e mesun edificio a anuncia e firma di un acuerdo di huur cu Cocolishi Studios pa huur e parti ariba di e edificio. “Nos ta hopi contento di por anuncia cu nos a logra yega na un acuerdo di huur cu Cocolishi Studios pa asina nos por huur e parti ariba di e edificio”, Nava a indica.

El a remarca cu un di e retonan mas grandi cu e fundacion tin ora ta trata di monumentonan ta pa por haya un funcion pa e monumentonan. Den e caso aki, el a sigui menciona, nan tin un edificio ideal cu tin dos entrada separa y asina nan ta logra combina dos diferente funcion, un studio di produccion y un restaurant.

“Locual ta haci nos hopi contento ta cu e edificio lo ta accesibel pa publico tambe den futuro mirando e funcionnan cu lo wordo eherce den e edificio, pues un restaurant y un compania di produccion, y asina e historia di ex-Botica Aruba lo sigui pa e futuro generacionnan”, Nava a resalta.

E edificio di Steenweg 19 ta un monumento di 1925 construi pa Addison Croes cu hunto cu Gustave Nouel a cuminsa cu e prome botica di Aruba y esaki a dura pa 50 aña largo. Despues cu e botica a cera su portanan el a bira El Mercado di Palais Hindu y despues na 2015 Stichting Monumentenfonds Aruba a cumpra e edificio. Pa algun tempo a haci uso di dje como un atelier di arte y despues na 2020 a cuminsa cu e restauracion di e fachada.

Por ultimo Nava a splica cu e siguiente fase despues di firma e acuerdo di huur lo bira hunto cu Cocolishi Studios, SMFA lo traha riba e renobacion di e interior y asina pa proximo aña por haci apertura oficial.