Durante un conferencia di prensa ayera mainta Stichting Monumentenfonds Aruba a presenta e proyecto ‘Tales of Cas Veneranda’. Un proyecto cu lo enfoca ariba e contamento di e diferente storianan di e cas aki.

Luna di september ta conoci como e luna di monumentonan y Stichting Monumentenfonds Aruba (SMFA) tin varios bon noticia pa loke ta diferente proyecto y ayera a anuncia e inicio di e proyecto ‘Tales of Cas Veneranda’.

Directora di Stichting Monumentenfonds Aruba, Anne Witsenburg, a splica cu e proyecto ta bayendo bon y paso pa paso nan ta yega na e restauracion di e edificio historico aki, pero no obstante e proceso di preparacion tin hopi trabao. Ultimo informacion cu a ricibi tocante Cas Veneranda tabata cu e fundacion a cumpra e cas y a firma acuerdo di compra. Aworaki e fundacion ta den e proceso di notaris pa asina pasa e cas ariba nomber di Stichting Monumentnefonds Aruba oficialmente.

Mientras proceso aki ta canando, Witsenburg a indica, ya caba e fundacion a cuminsa cu e coleccion di storianan di e cas, di potretnan bieu y ta haciendo e parti di investigacion. Pa esaki, el a remarca, nan mester ayudo di e publico general di Aruba.

Witsenburg a informa cu pa e proyecto di restauracion di Cas Veneranda nan a a scoge un arkitecto caba y despues a scoge un ekipo di construccion tambe cu ta involucra den full e proceso di restauracion.

Orlando Hoevertsz, e arkitecto encarga cu e proyecto aki, a splica cu actualmente nan ta realisando e investigacion preliminar. El a conta cu ora cu nan a haya e cas, esaki tabata full cera y tabatin basta choller rond di e cas y paden di e cas tambe. Prome cos cu Stichting Monumentenfonds a haci ta un bon limpiesa di e edificio, di e prome piso como tambe e piso abao, sin haci ningun daño na e edificio mes.

El a sigui splica cu nan mester haci un investigacion ainda di kico ta original di e edificio y kico a bin acerca despues pa motibo cu e cas tabatin diferente funcion. E ekipo a haci un 3D scanning di full e cas y siguientemente mester haci un drone shot pa wak tambe e gootnan cu tin cu ta di beton y cu no por wordo mira for di abao.

“Tur e tipo di cosnan ey nos ta haciendo ainda y poco poco nos ta yegando na un plattegrond manera e ta actualmente,” el a indica.

Hoevertsz a conta cu e mapa original di e edificio ta di aña 1936, pero e cas no a wordo traha exactamente manera e mapa tabata pinta. Tin un tiki diferencia den e dak y tin un extension cu a wordo construi cu no nan sa precies den ki aña esey a tuma luga.

El a agrega cu parti patras di e cas tabatin diferente funcion, entre otro un restaurant den añanan 80 y un discoteca tambe, segun por a compronde y nan a traha cierto cosnan den e cas cu no ta original cu mester wordo tumba abao.

Hoevertsz a remarca cu e piso di abao tin un poco mas desafio pa e ekipo di construccion cu e prome piso y pa e motibo ey tambe Stichting Monumentenfonds a tuma e decision pa scoge un ekipo di construccion prome cu e destaho publico pa e contratistanan pasobra e subcontratistanan tambe lo ta envolvi den e fase di diseño.

“Tin hopi desafio pa converti e cas den un oficina moderno cu tin mester di e aporte di e ekipo di construccion. Den luna di september lo termina cu e fase di investigacion preliminar y despues hunto cu e ekipo di construccion lo pasa na e parti di e diseño definitivo pa e oficina nobo,” el a finalisa.

Mircla Nava, PR & Marketing di Stichting Monumentenfonds Aruba a splica cu e parti di e proyecto di ‘Tales of Cas Veneranda’ ta financia pa Prins Bernard Cultuurfonds Caribiesch Gebied.

El a agrega cu pa e proyecto aki e fundacion ta colaborando hunto cu MIC (Mobile Interaction Company) di Hulanda cu nan proyecto ‘Tales of Culture’. Un proyecto cu e organisacion aki ta uzando caba basta tempo na Hulanda na museo- y actividadnan cultural y tambe monumentonan caminda tur hende por contribui cu nan storianan, tanto e trahadonan, como e comunidad y boluntarionan.

Stichting Monumenetenfonds a scoge e proyecto di Cas Veneranda como proyecto piloto pa ‘Tales of Culture’ y a dun’e e nomber ‘Tales of Cas Veneranda’ pasobra den e caso aki lo conta e storianan di Cas Veneranda. Despues di tempo e fundacion lo evalua pa wak si por usa e mesun sistema aki cu otro monumentonan pa asina un y tur por contribui cu e storianan, pero tambe pa comunidad y bishitantenan por siña mas di e historia di e monumentonan.

Nava a sigui splica cu e meta di e proyecto ta pa comunidad por participa activamente compartiendo nan storia-, anecdota-, recuerdo-, y fotografianan. Den e caso aki di e famia cu a biba den e cas, specialmente Federico Maximiliano Arends, conoci manera Machi y Maria Veneranda Arends Lacle, pero tambe fotografia- y storianan di e cas mes na Wilhelminastraat 7.

“Asina hunto cu e comunidad nos por preserva e historia di e bunita monumento aki pa futuro generacionnan,” el a enfatisa.

E proyecto aki lo tin un duracion di un aña largo. El a splica cu tur luna lo tin poster nobo na e edificio y desde ayera tin e prome poster poni cu tin un QR code riba dje, tur hende cu pasa dilanti e edificio por scan e QR code, of tambe a traves di un link ariba e pagina di Facebook di Stichting Monumentenfonds, y traves di e QR code y e link por yega na e website pa asina por conta nan storia di e cas aki. Stichting Monumentenfonds ta ricibi tur e storianan y ta controla tur e storianan pa wak sigur cu no tin nada cu no ta corecto skirbi of tin biaha confirma e storianan tambe.