Firma SMAC permiso (4).JPG
–  Prome Minister Mike Eman hunto cu miembronan di directiva di Stichting Maneho di Aruba su Carnaval (SMAC) a firma e documento cu ta autorisa SMAC pa organisa tur actividad di Carnaval 63.
 
Tabatatin algun retonan durante e ultimo añanan en cuanto ta maneho di Carnaval segun Prome Minister Mike Eman, agregando cu: “Pa nos ta hopi importante pa nos yega na un momento cu tin un trankilidad den e maneho di Carnaval pa asina tur forsa, energia y dedicacion por enfoca riba e maneho di Carnaval sin wordo desorienta.” E permiso aki ta valido pa e periodo di Carnaval 63 anto SMAC lo mester sinta bek cu gobierno e siguiente aña, wak si lo tin algun cambionan anto e ora pidi pa un otro permiso.
 
Acuerdo entre SMAC y MUSICA
Durante ultimo lunanan tabata tin dialogo entre gobierno y diferente ‘stakeholdersnan’ cu ta forma Carnaval di Aruba. E gruponan cu ta participa den Carnaval, gruponan musical como tambe cu SMAC por a bin hunto den harmonia, segun e partidonan envolvi. A logra un acuerdo entre SMAC y MUSICA en cuanto ta otorgacion di permiso pa organisa Calypso anto segun Prome Minister, despues di tanto discusion cu tabata tin relaciona cu e asunto aki den pasado, aworaki ta haci e trabao mas facil pa yega na e punto y firma. 
 
SMAC a firma un documento caminda ta otorga nan permiso pa organisa tur evento y yega na acuerdonan separa manera cu MUSICA pa organisa e parti cu ta toca nan. “Gobierno cu trankilidad ta duna SMAC e permiso general pa organisa tur actividad di Carnaval. Esey no ta kita cu SMAC por acerca gobierno y bisa pa tog duna e permiso pa un parti di cierto actividad di Carnaval wordo organisa door di un otro organisacion, e ora ey gobierno logicamente lo coopera cu nan tambe pa e permisonan di Polis y tur otro cooperacion cu nos como gobierno ta duna,” Minister Eman ta subraya.
 
 
Diferente organisacion, un solo meta
Segun Prome Minister, Carnaval ta central pa Aruba anto por tin hopi organisacion cu ta envolvi pero nan tur ta comparti e mesun meta cual ta yuda nos pais resalta y resalta manera un di e Carnavalnan di mas bunita den nos region, como tambe resalta den e union cu cual esaki ta wordo haci. “Rond mundo ta conoci cu Carnaval ta un di e momentonan unico di locual nos ta yama  den e filosofia di un nacion comunitario, con tanto organisacion ta bin hunto den un periodo cortico, traha hunto y haci algo bira realidad den un periodo asina cortico cu tur cos den su luga riba e fecha cu e mester ta. Esey ta un bunita ehempel di e solaridad y cooperacion cu tin entre e organisacionnan como hopi biaha tambe e yudansa di uno pa cu otro. Banda di tur e color, musica y tur e ambiente, esey ta loke ta haci Carnaval bunita”, Prome Minister ta splica.