Stichting Maneho di Aruba su Carnaval (SMAC) hunto cu studiantenan di Universidad di Aruba a traves di su rednan social a bin informando cu nan ta bezig haciendo un proyecto cu ta trata di un encuesta den e comunidad di Aruba tanto esnan cu ta carnavalista of no.
Segun SMAC su presidente, Darren van Ommeren a sigura, e encuesta aki ta pa motibo cu nan kier sa e interes di Aruba su carnaval y cu SMAC tin e necesidad pa crea data pa por guia un miho carnaval.
“E factornan cu lo por afecta esaki, por ehempel e factor socio-economico. Nos ta dos studiante di Universidad di Aruba, di e facultad di Arte y Ciencia y ta studiando Organisacion, Gobernacion y Maneho. Nos a haya como tarea pa ta “Asistente di Investigacion” pa Stichting Maneho di Aruba su Carnaval miho conoci como SMAC.
Nos ta interesa pa sa bo opinion tocante Aruba su celebracion cultural di mas grandi cu ta Carnaval. E participacion pa encuesta ta boluntario y tur contesta lo ta anonimo. Nos lo aprecia bo cooperacion pa cu nos estudio.”
Aunke temporada di carnaval a pasa caba e aña aki, SMAC ta keda activo pa diferente actividad manera esun cu nan a anuncia dia 11 di april ultimo cu ta trata nan prome fundraising pa tur carnavalista cu ta desea di participa den Carnaval 70.
Esaki ta un actividad hunto cu Bingo Aruba den cual van Ommeren ta sigura cu ta un concepto diferente y cu awor tur persona por haya e oportunidad di participa of di ta envolvi den loke ta trata Carnaval pa nan por haya fondonan y por cubri nan participacion den e celebracion di mas grandi cu Aruba tin, su carnaval.
Den e caso aki tur e ticketnan ta obtenibel na sede di SMAC, cualkier persona carnavalista por ta un bendedo y por acerca na nan pa nan por bira un punto di benta riba nan mes pa por bende bingo aki.
Un bes cu e persona ta bay bende e ticketnan, e persona aki ta bay ricibi un comision di 15 florin “e participante aki por bende pa por cubri su participacion den e paradanan di carnaval di Aruba, esaki tambe por yuda e reinanan tambe pa por cubri un parti di nan gastonan, igualmente e gruponan y musiconan,” van Ommeren a informa.
E bingo ta bay tin mas cu 50.000 florin den premionan, e cuatro prome premio lo tin un balor di 2.500 florin cada un, e di dos tanda di cuatro wega tin 5.000 florin di premio pa cada wega y e dos ultimo wega ta bay tin 10.000 florin di premio.
Den total ta 10 wega cu ta bay wordo hunga diadomingo 11 di juni, 5or di atardi na unda ya caba a cuminsa e benta di e ticketnan.
