– Dia 8 di november, Stichting Maneho di Aruba su Carnaval (SMAC), a tene su prome conferencia di Prensa. Den sala di conferencia di ATA, SMAC a tuma e oportunidad pa trece dilanti algun puntonan y desaroyonan na inicio di e temporada di Carnaval 63
Khalilah Croes, PR di SMAC, a habri e conferencia yamando tur presente bon bini y desde awor gradiciendo prensa pa nan bon cooperacion semper durante Carnaval uzando nan medio di comunicacion pa yuda SMAC na informa e pueblo carnavalesco debidamente. A sigui na lesa un mensahe di Presidente saliente Sr. Randy Thiel, cu pa motibo di kebrante di salud, no por tabata presente. En breve Sr. Thiel a gradici su team cu el a traha cu ne ultimo dos añanan y tambe Gruponan Uni di Carnaval cu dun’e e confiansa pa representa nan durante e dos aña di su presidencia y mandando un gradicimento special na Sr. Otmar Oduber pa su sosten 100% pa cu SMAC y su persona, particularmente.
El a expresa hopi satisfaccion, pa motibo cu e Directiva nobo di SMAC desde 8 di november por conta cu un Directiva completo di 11 miembro, dunando asina e empuhe extra pa por desplega e trabou grandi cu mester wordo haci. Sr. Randy Thiel, a desea e board completo hopi exito y animo pa e temporada nan dilanti, dunando e president nobo y su directiva tur confiansa y apoyo di su persona.
Siguientemente a hiba palabra. Sra. Shannon Henriquez, Presidente actual di SMAC. Sra. Henriquez a anuncia cu e Directiva riba e dia aki lo ser completa cu 4 miembro mas, representando e musiconan. Anunciando Sr. Victor Mathilda, Sergio Tjie A Loi, Sr.Villamizar Hassell y Sr. Quincy Hasham como representantenan di Stichting MUSICA. Sra. Henriquez a sigui pa presenta su mes como Presidente di SMAC , Sra. Ghislaine Winterdaal como Vice-Presidente, Sra. Zuleika Wever como Secretaris, Sra. Joally Croes como Tesorera, Sr. Ron Refunjol como representante di Gruponan Uni y Sr. Jason Brown y Sr. Julio Wever como miembronan Independiente.
Despues Sra. Henriquez a anuncia cu a yega na e conclusion conhuntamente cu Stichting MUSICA y cu e mediacion di Sr. Otmar Oduber cu Stichting MUSICA lo organisa y carga CAISO y SOCA Monarch 2017. Pa e acto di firmamenot tabata presente Sra. Edwina Werleman, vice-presidente y acting president reemplasando Clyde Burke, cu ta sufriendo un kebrante di salud. Sra. Werleman a expresa su satisfaccion na nomber tambe di tur musico, cu Stichting MUSICA a logra yega na un acuerdo y forma nobo y positivo di traha hunto cu SMAC, pa sigura cu tur hende por disfruta di un Carnaval 63 completo cu e musica di bandanan cu ta lansa nan miho produccionnan durante e temporada di carnaval, pa pueblo por gosa di dje. A haci e acto di firmamento entre e dos organisacionnan aki.
Ariba e dia aki tambe a entrega e Cuenta Anual na nomber di Sr. Randy Thiel den man di Presidente Sra. Henriquez. Sra. Henriquez a entrega un ehemplar na miembro di Raad van Toezicht di SMAC, Sr. Hubert de Cuba tambe na Representante di Bureau di Ministerio di Cultura, Sra. Indra Zaandam y tambe na Representante di Aruba Tourism Authority, Sr. Patrick Melchiors. Di e manera aki clausurando e temporada di Carnaval 62.
Sra. Henriquez a termina bisando ta agradecido di e sosten di Sr. Otmar Oduber durante su temporada como Minister di Cultura unda cu el a sa di duna su sosten completo na SMAC, y a expresa speransa cu e siguiente mandatario tambe tin e mesun entusiasmo y motivacion pa cu e desaroyo continuo di Carnaval di Aruba.
Prensa a ricibi tambe e Schedule oficial di Carnaval 63, aproba pa KPA.
SMAC kier recorda Pueblo Carnavalesco riba e prome actividad pa e temporada di Carnaval 63 esta LEGENDS FESTIVAL, riba 11/11.Uneventocompletamente gratis pa pueblo gosa di dje y di e manera aki lanta e keintura di Carnaval cu un fiesta mahestuoso na Carnival Village. Legends Festival lo inicia 7or di anochi y lo sigui te 2or di marduga. Bandanan STEAM, Tsunami, ‘N Fuzion, Le Groove y Buleria.
Un danki na ATA, pa pone nan espacio disponibel pa e conferencia di prensa y na Sr. Chibi van der Hans pa e potretnan.
